И йикъара яшлу шаир, мухбир, чIехи хизандин кьил Абдуллаев Дагълар Агъамович рагьметдиз фена.
Лезги кIелзавайбуруз ам Кьехуьл Дагълар — литературадин лакIаб (тахалус) алазни чида, гьикI хьи, адан сифте эсерар гьа и тIвар алаз акъатна. Ахцегь райондин “ЦIийи дуьнья”, республикадин “Коммунист” газетриз ва маса изданийризни.
Д.А.Абдуллаев Ахцегь райондин Кьехуьлрин хуьре 1933-йисуз дидедиз хьана. Ина сифтегьан мектеб, Ахцегьа юкьван школа, Буйнакскда профтехучилище, Москвада Литературадин институт акьалтIарна.
Гзаф йисара республикадин “Коммунист” газетда ва Лезги радиода журналиствиле кIвалахна.
Адан къелемдикай шиирринни поэмайрин “Чанахда варз”, “Фикирар”, “Гатфарин чил”, “Сирнавзавай булутар”, “ЦIикьвед варз” лезги чIалал ва Москвада 1967-йисуз урус чIалал “Дагъдин рекьер” ктабар, цIудралди очеркарни фельетонар, рекьерин къейдер, зарисовкаяр, суьгьбетар хкатна.
Д.Абдуллаев РФ-дин писателрин ва журналистрин союзрин член тир. Адан зегьмет “Зегьметдин ветеран” медаль, маса шабагьар гуналди къейднава.
Шаир алатай асирдин 80-йисарилай инихъ вичин ватанэгьлияр куьч хьанвай Мегьарамдхуьруьн райондин Гилийрин хуьре яшамиш жезвай.
Чна рагьметлудан хизандиз, мукьва-кьилийриз, вири багърийриз башсагълугъвал гузва. Шаирдин тIвар чи рикIера гьамишалугъ амукьда.
«Лезги газетдин» редакциядин коллектив
