Къуллугъ тавуртIа — жерме
Набутриз, пенсионерриз талукь тирвал къуллугъар кьилиз акъуд тавур тешкилатар жерме ийида. Ихьтин дуьшуьшда къуллугъдал алай кас 30-далай 50 агъзур манатдал кьван жерме ийида. Юридический къурулушар — 300 агъзурдалай 500 агъзур манатдал кьван.
Дарманар багьа авуртIа…
Дарманрин къиметар лазим кьадардилай артух хкажайтIа, жавабдарвал хиве тунин къайда кардик кутадайвал я. Эгер къуллугъдал алай касди дарманар вичин хушуналди еке къиметриз акъудайтIа, ам 250 агъзурдалай 500 агъзур манатдал кьван жерме ийида.
Хсуси карчийрин ва юридический къурулушрин хиве абуру къиметар кьадарсуз хкажунин нетижада хьайи къазанжидин кьве кьадардиз барабар пул жерме гун гьатзава.
Интернетдай маса къачуз жеда
Дарманар, интернетдай заказ авуна, кIвализ кьван хкиз тадай мумкинвал жеда. Икьван чIавалди герек тир дарманар гьар гьикI ятIани, аптекадай къачуниз мажбур жезвай.
Къейдзавайвал, закон рецептрай тайинарнавайбурузни, рецептрай туширбурузни талукь жезва.
Техосмотрдин цIийи къайдаяр
Акъудайдалай инихъ 4 йис тамам тахьанвай автомобилар техосмотр кьиле тухуникай тамамвилелди азад жезва. 4 йисалай 10 йисал кьван “яшара” авай автомобилриз техосмотр кьве йиса садра кьиле тухуда. Акъудайдалай инихъ 10 йисалай алатнавай автомобилриз техосмотр гьар йисуз кьиле тухун чарасуз я.
Гьазурайди — Куругъли Ферзалиев
