Зегьметда еке агалкьунар къазанмишнавай Салман Мегьамедрасулович Бабаев алай вахтунда неинки Сулейман-Стальский райондин агьалийриз, гьакI вири лезгийриз, дагъустанвийриз машгьур я. Адан мергьяматлувилин крарикай чаз райондай мукьвал-мукьвал хъсан хабарар агакьзава. Агьалияр коронавирусдин тIугъвалди кIеве тунвай макъамдани ада вич халис ватанперес, лезги чилин лайихлу хва тирди субутна. Инал тек са делил гъун бес я: и мукьвара ада коронавирусдихъ галаз женг чIугунин карда куьмек хьун патал хсуси такьатрикай 5 миллион манат Сулейман-Стальский райондиз ракъурна.
Салман Бабаев 1955-йисан 1-сентябрдиз дидедиз хьана. 1971-йисуз Агъа СтIал-Къазмайрин муьжуьд йисан, 1973-йисуз Герейханован хуьруьн мектеб тафаватлудаказ куьтягьна.
1978-йисуз ада Хабаровскда ракьун рекьин улакьрин инженеррин институтда кьилин образование къачуна. Пешедин рекьяй адан зегьметдин рехъ Дальний Востокдин ракьун рекьин Комсомольск-на-Амуре станциядал поезддин къуллугъчидин куьмекчи яз кIвалахунилай башламиш хьана. Ахпа адакай станциядин дежурный, диспетчер, Комсомольскдин отделенидин поездрин диспетчер хьана. Алакьунар ва гележег авай пешекар къуллугъдин гурарай датIана виликди хкаж жезвай. Ада 1980-1997-йисара кьилин инженервиле, 1982-1986-йисара Комсомольск-Сортировочный, Хабаровск — 2 станцийрин, Байкало-Амурский ракьун рекьин начальниквална. Гуьгъуьнлай Дальний Востокдин, Кеферпатан Кавказдин ракьун рекьерин начальникрин заместитель яз зегьмет чIугуна.
1987-1997-йисара ада Байкало-Амурский ракьун рекьел жуьреба-жуьре къуллугърал (Ургальский отделенидин руководителвиле, ракьун рекьин начальникдин заместителвиле, гуьгъуьнлай анин руководителвиле) зегьмет чIугуна. Ракьун рекьерихъ галаз алакъалу жавабдар ва чIехи къуллугърал ам мадни гзаф хьана. 2002-йисуз ам гьа са вахтунда РФ-дин МПС-дин (министерство путей сообщения) къвалав гвай фирменный транспортдин сервисдин центрадин кьиле акъвазна.
2007-йисал кьван “РЖД” ОАО-дин вице-президентвиле кIвалахна, 2011-йисуз коммерциядин кIвалахдин рекьяй и тешкилатдин вице-премьервиле тайинарна. Жавабдар къуллугъдал ватанэгьлиди гьакъисагъвилелди та пенсиядиз экъвечIдалди (2017-йис) кIвалахна.
ЧIехи къуллугърал хьайи Салман Мегьамедрасулович вини дережадин шабагьрин сагьибни я: РФ-дин транспортдин лайихлу къуллугъчи, “Знак Почета” орден, “Ракьун рекьин транспотда гьакъисагъвилелди чIугур зегьметдай”, “Ракьун рекьин сейли къуллугъчи” лишанар, “Байкало-Амурский магистралдин 30 йис” медаль…
2010-йисуз “Коммерсантъ” газетди адаз “Транспорт” номинациядай кьуд лагьай чка ганай. “РЖД” ОАО-дин кIвалахар вилик тухуник еке пай кутунай, намуслувилелди къуллугъ авунай Салман Бабаев компаниядин президентди «РЖД» ОАО вилик тухунин лайихлувилерай» сад лагьай дережадин лишандалди къейдна.
2019-йисан мартдиз ам “Локомотив” футболдин клубдин директоррин советдин членвиле хкяна.
Бабаеврин хизанда кьве рушни кьве хва чIехи хьана. Рухваярни бубадин геляй фена — абуру ракьун рекьерин институтар куьтягьна ва и пешедай кIвалахзава.
Куругъли Ферзалиев
