ЭлячIун теклифна

США-дин сенатдин международный крарин рекьяй комитетдин кьил Д.Риша Белоруссиядин президент А.Лукашенкодиз, эгер уьлкведа сечкийрин нетижаяр тестикь тахьайтIа, отставкадиз фин теклифна. Адан гафар “Новости” РИА-ди раижна.

США-дин векилдин фикирдалди, эгер Лукашенко демократия­дин рекьелди хкя хъувунвачтIа, ам къуллугъдилай элячIун лазим­ я. “Гьукум ислягьвилелди масадав вахкун Белоруссиядин ге­лежег ва аслу туширвал патал чарасуз месэла я”, — лагьана ада.

Белоруссияда къуватдин къурулушрин къуллугъчийрин ва 9-августдиз кьиле фейи президентдин сечкийрилай наразивалзавай агьалийрин арада куьчейра чуьруькар кьиле физва. Авай делилрал асаслу яз, А.Лукашенкодиз сечкийрин нетижада 80 процент сесер хьана, оппозициядин регьбер С.Тихановскаядиз — 10 процентдилайни тIимил.

МИД-ди къимет гана

Россиядин къецепатан крарин министерстводи Белоруссияда президентдин сечкийрилай кьулухъ арадал атанвай наразивилерин гьалариз къимет гана. Официальный къейдер ТАСС-ди раижна.­

Къейдзавайвал, сечкийрин вахтунда кьиле фейи вакъиайриз Москвади дикъетлувилелди фикир гузвай. Кьилдин къуватри на­разивилерин гегьенш серенжемар тешкилунин алахъунар аву­натIани, Минскдивай хаталу гьалариз рехъ тагуз алакьна.

Россиядин МИД-ди гьисабзавайвал, Белоруссиядин халкьди авунвай хкягъуни кьве уьлкведин арада авай дуствал мягькемарда ва республикадин вилик акъвазнавай месэлаяр гьялун давамардай мумкинвал гуда. Гьа са вахтунда Москвадин терефди Белоруссияда Россиядай тир журналистар кьунай, гьакIни июлдин эхирра эглешарай 33 россиявидин патахъай гьайиф чIугвазва.

Идалай вилик Россиядин МИД-дин векил М.Захаровади векъивилелди Белоруссияда Россиядин журналистар эглешарун рехъ тагана кIани кар тирди малумарнай.

Мектебар гьазурзава

Санитариядин рекьяй хатасузвилин вири серенжемрал амал авуналди, Россиядин мектебра ва вузра 1-сентябрдилай тарсар адетдин къайдада башламиш жеда. Идан гьакъиндай РФ-дин просвещенидин министр С.Кравцова Президент В.Путина гьукуматдин векилрихъ галаз тухвай совещанидал малумарна, хабар гузва “Новости” РИА-ди.

“Алай вахтунда образованидин 36 485 идара тамамвилелди цIийи кIелдай йисаз гьазур я, анра лазим тир вири серенжемар кьиле тухванва. КIвалах пландин бинедаллаз кьиле физва”, — лагьана министрди.

Адан гафаралди, дараматрин къене маскаяр алукIун чарасуз жеда. Физкультурадин тарсар ачух гьавадал кьиле тухуда. Идалайни гъейри, кIелунин цIийи йисалай Россиядин гьар са мектебда медицинадин къуллугъчи жеда.

Коронавирус

12-августдин делилралди, дуьньяда коронавирусди начагъа­райбурун кьадар 20 295 343-дав агакьнава. Вирусди 741 423 кас кьена. Сагъ хъхьайбурун кьадар 12 592 114-дав агакьнава. ТIугъ­валди дуьньядин 188 уьлкведал гьужумнава.

12-августдиз Россияда коронавирус акатнавай 5102 кас дуьздал акъудна. Санлай къачурла, чи уьлкведа вирусди 902 701 кас начагъарна. Вирусди кьенвайбурун кьадар 15 260-дав агакьнава, 710 298 кас сагъ хъхьана. Оперативный штабдин делилар “Лента.ру” чешмеди раижна.

ЧIехи месэла

США-дин президент Д.Трампан фикирдалди, ядерный рекьяй яракьламиш хьун тIимиларуниз талукь яз Россиядихъ галаз кьиле физвай рахунар  международный чIехи месэла я. Адан зенд “ТАСС” чешмеди раижна.

Америкадин регьбердин гафаралди, Россиядин терефдиз США-дихъ галаз ядерный яракьрин гьакъиндай икьрар кутIуниз кIанзава. Гьавиляй кьве терефдини алай вахтунда и месэладал кIвалахзава. Кьиле физвай рахунриз ада хъсан къимет гана.

Емишрин хаталувал

Духтур-пегьризчи М.Марудовади малумарнавайвал, некьияр, хамзарар, шурван пIинияр ва маса яру емишар аялриз ва жа­ванриз мукъаятвилелди гана кIанда, гьикI хьи, и рангунин няметри агъургъан гъун мумкин я. Пешекардин теклифар “Интерфакс-Запад” чешмеди раижна.

Артухан заланвал авай ксариз емишар кьилдин ем хьиз тIуьн теклифзавач, вучиз лагьайтIа абурун кислотади иштягь ачухарун мумкин я. Пешекарди шегьре рекьин къерехра маса гузвай емишарни тIуьн тавун меслят къалурзава, вучиз лагьайтIа муьштерийриз абур мус ва гьинай кIватIнавайбур ятIа чир жедач. Мисал яз, бязи емишрик зарарлу металлар акатун мумкин я. Гьавиляй супермаркетрай ва махсус шагьадатнамаяр авай алверчийривай маса къачун меслят къалурзава. Пегьризчидин гафаралди, емишрикай мурабаяр ва маса затIар ргадалди абур муркIадив кьаз туна хуьн хъсан яз гьисабзава, вучиз лагьайтIа мурабайрик шекердилай гъейри “чан алай” витаминар кумукьзавач.

«Лезги газет»