Коронавирусдин тIугъвал арадал атанвай шартIара Дагъустан Республикадин экономика дурумлудаказ вилик фин ва яшайишдин жигьетдай гьалар пайгардик хьун таъминарунин рекьяй Оперативный штабдин нубатдин заседание 11-августдиз РД-дин Гьукуматдин Председатель Артем Здунован регьбервилик кваз кьиле фена.
Штабдин заседание РД-дин Гьукуматдин Председателди кIвалахдин цIийи чкаяр тешкилунин месэладиз талукь яз тапшуругъ гунилай башламиш хьана. Артем Здунова къейд авурвал, и месэладай талукь тир делилар агьалийрив тамам дережада агакьдайвал, кIвалах теклифзавай организациядин тIвар, ам авай чка, телефондин нумра раиж авун герек я. КIвалах сезондинди яни, тахьайтIа вахтуналди эцигунардай объектрал кардик кутазвайди яни, гьадан патахъайни хабардар авун герек я.
Ахпа совещанидин иштиракчийри, Махачкъалада автомагазинрай (автолавкайрай) алишвериш кьиле тухудай мумкинвал гуналди, хуьруьн майишатдин продукция гьасилзавайбуруз ва агьалийриз куьмекар гунин серенжем веревирдна. Артем Здунова къейд авурвал, са тIимил вахтарилай зул алукьда. ГьакI хьайила, а саягъда алишвериш тешкилуникай хуьруьн майишатдин секторда кIвалахзавай карчийриз, гьакI агьалийризни куьмек жеда, гьикI лагьайтIа, и къайдада маса гузвай шейэрин къиметар базардинбурулай агъузбур я.
РД-дин карчивилин ва инвестицийрин рекьяй агентстводин руководителдин везифаяр вахтуналди тамамарзавай Камил Мегьамедова и месэла гьялунин кьве тереф авайдакай хабар гана.
“Сад лагьай тереф алишверишдин авай майданар, бустандин ва маса майваяр маса гуниз кьецI гун тийидайвал, кардик кутуникай, кьвед лагьай тереф ярмаркаяр цIийи дережада тешкилунин махсус проект уьмуьрдиз кечирмишуникай ибарат я. Ам чна сентябрдиз гъиле кьада. И макьсаддалди агентстводи 10 автомагазин маса къачуда. Республикадин Минсельхоздин субсидияр чара авунин программадикай менфят къачуналди, талукь тир техника маса къачудай хуьруьн майишатдин продукция гьасилзавайбуруз чпиз чара авунвай алишвериш кьиле тухудай чка датIана кардик хьунин мумкинвилерни веревирдзава”, — лагьана ада.
Артем Здунова къейд авурвал, и проектдиз республикадин маса шегьеррани итиж авун мумкин я. Гьавиляй агентстводи ам уьмуьрдиз кечирмишун патал гьинай вуч ва гьикI маса къачун лазим ятIа, гьа кар тамамвилелди аннамишун герек я.
Заседание кьиле фидай чIавуз РД-дин Гьукуматдин Председателди, садакай масадак акатдай азарар чукIуниз рехъ тагудайвал, профилактикадин, тIугъвалдиз акси серенжемар кьиле тухудайвал, республикадин Минздравдиз 24 миллион манатдин такьатар чара авунвайдан гьакъиндай хабар гана.
“Талукь тир тапшуругъдал за къул чIугунва. Садакай масадак акатдай азаррин хура акъвазиз гьазур яз жедайвал, чна герек тадаракар, энгел тавуна маса къачуда. Азаррикай хатасуз ийидай шейэр чи республикада гьасилзавайбур маса къачуда. За талукь тир министерствойривай ва ведомствойривай и кардал кьетIендаказ фикир желб авун тIалабзава. Лазим вири шейэр вахтунда, тIем акакьдай къиметрай, талукь тир еридинбур маса къачун герек я”, — къейдна премьерди.
Штабдин кIвалах давамарун яз, заседанидин иштиракчияр кIвалахдин цIийи чкаяр тешкилунин месэла веревирд авунал элячIна.
РД-дин экономикадин ва мулкар вилик тухунин министр Гьажи Султанова Дагъустанда цIи бейкарвал артух хьунин дережа санлай уьлкведа авайдалай хейлин агъузди тирди къейдна.
“Виликдай оперативный штабдин заседанидал кьабулай къарарар вилив хуьналди, кIвалахдин алава чкаяр тешкилуникай рахайтIа, алай йис патал планда абурун кьадар 4284-дан артухарнава. И кардик РД-дин Минтрансдин, РД-дин Минсельхоздин, РД-дин Минстройдин иллаки еке пай ква. КIвалахдин цIийиз тешкилнавай чкайрин кьадардикай рахайтIа, йисан сад лагьай паюна — 8261 чка, гьа гьисабдай датIана кIвалахдай — 2890, вахтуналди кIвалахдай — 2605 ва сезондин кIвалахардай — 2766 чка тешкилнава.
Министрдин рахунриз баян гайи Артем Здунова Гьажи Султановал и барадай план гьар са министерстводихъ галкIурун тапшурмишна.
“Лазимвал арадал атайтIа, а план зи къарардалди галкIуриз жеда, гьар са министрдиз пландин делилар чир хьун, а план, вичин мумкинвилер вилив хуьналди кьилиз акъудиз чалишмиш хьун герек я”, — къейдна премьерди.
КIвалахдин цIийи чкаяр тешкилунин, бизнесдиз куьмекдин гъил яргъи авунин ва са жерге маса месэлайрай талукь тир министерствойрин руководителар рахана. Кьилди къачуртIа, бизнесдиз гьам республикадин, гьам федеральный дережада куьмек гунин къайдаяр веревирдна.
Штабдин заседанидин нетижаяр Артем Здунова кьуна.
«Лезги газет»
