(Эвел-23-28,30-31-нумрайра)
- (Аллагь) цаваринни чилин Халикь я (абур) чешне авачиз арадал гъайи. Ва Ада са кар къаза — кьадар авурла (а кар хьун кIан хьайила), Ада анжах лугьузва “Хьухь!”, ва (а кар гьасядта) жезва.
- Ва чпиз (пайгъамбаррин кардин гьакъиндай) чирвилер авачирбуру (араб-мушрикри) лагьана: “Бес, раханайтIа чахъ галаз Аллагь (вун Адан расул тирди тестикьариз), ва я атанайтIа чаз делил (лишан — а кар тестикьардай)!”. Гьа икI, абурулай вилик хьайибуруни (вилик хьайи уьмметри чпин пайгъамбарриз) лагьанай, гьабурун гафариз ухшарди: абурун (виликдай хьайи ва эхиримжи кафиррин) рикIер сад-садаз ухшар я. Гьакъикъатда, Чна баян гана ачухарнава делилар якъиндиз инандирмиш ксариз.
- Гьакъикъатда, Чна вун Гьахъ (дуьз дин Ислам) гваз ракъурнава (мусурманриз Женнетдин) “шад хабар гудайди” ва (кафирриз чеб гуьзетзавай азабдикай) “игьтиятвал авунин хабар гудайди” яз, ва (вуна Гьахъ агакьарайдалай кьулухъ) вавай хабар хкьадач (жавабдарвал) Джагьимдин (ЦIун) эгьлийрин патахъай.
- Ва гьич рази жедач валай я чувуд дин гвайбур, я насранияр, та вун абурун диндиз табий жедалди. Лагь: “Аллагьдин Рехъ (Ислам — дин) ам я дуьз рехъ”. Ва эгер вун, ваз (гьакъикъатдин) чирвал (вагьй) атанвайдалай кьулухъ, абурун гьевесриз табий хьайитIа, ваз Аллагьдикай (вун Адан жазадикай) хуьдай, я арха (мукьва кас), я куьмекчи жедач.
- Чпиз Чна Ктаб ракъурнавайбуру (чпини) ам дуьз кIелуналди (лазим тирвал), адахъ инанмишвалзава. Ва ни адахъ кафирвалзаватIа, гьабур я еке зиянвиле авайбур.
- Эй, Исраилан рухваяр! РикIел гъваш (куьне) За квез гайи Зи (гзаф кьадар) няметар ва За квез (куь девирдин) амай алемрин винел артуханвал гайиди (квез гзаф пайгъамбарар ва Ктабар ракъурна).
- Ва кичIе хьухь (квез) а Йикъакай — са чандивай (масадан) чандин патахъай са шейни эвез ийиз тежедай (са касдивайни маса касдиз гьич са куьнинни куьмекни гуз жедач) ва адавай (жазадикай азад авунин) барабар гьакъини кьабул тийидай ва адаз шафаатдини (килиг: 4-сура 85-аят) менфят тагудай ва абуруз са куьмекни гун тийидай!
- Ва (рикIел гъваш вуна эй, Пайгъамбар), Ибрагьимаз адан Раббиди (Вичин) келимайралди имтигьан авур (адаз эмирар гайи ва къадагъаяр эцигай) вахт ва ада абур тамамвилелди кьилиз акъудна. Ада (Аллагьди) лагьана: “Гьакъикъатда, За вакай инсанриз имам (дуьз регьбер, хъсан чешне тир кас, яни расул) ийида”. Ада лагьана: “Ва зи (бязи) несилдикайни?”. Ада лагьана: “Зи агьт (За хиве кьунвай кар) зулумкаррал гьалтдач (ширк, гунагьар ийизвайбуруз адакай пай жедач)”.
- Ва (рикIел гъваш вуна, эй, Пайгъамбар) Чна “аль-Байт” (Кябе) инсанриз хкведай чка (элкъвена мад хкведай, гьаж, умра авун патал кIватI жедай) ва саламатвилин чка яз авур вахт. Ва (лагьана Чна): “Ибрагьиман макъамдикай (ам акъвазай чкадикай) квез капI ийидай чка яз яхъ (куьне)”. Ва тапшурмишна Чна Ибрагьимаз ва Исмаилаз; бес, михьи ая куьне (кьведани) Зи “Байт” (Кябе — гьар са чиркдикай, зирзибилдикай) тIавафзавайбуруз (Кябедихъ элкъвезвайбуруз), игьтикафзавайбуруз (ана ибадатиз авайбуруз) ва (гзаф) “рукугь-сажда” ийизвайбуруз!”
- Ва (рикIел гъваш вуна, эй, Пайгъамбар) Ибрагьима лагьай вахт: “Рабби! И уьлкве (Мекка) саламатди ая ва адан эгьлийриз (вири) емишрикай пай це (Вуна), абурукай Аллагьдихъ ва Эхиримжи Йикъахъ инанмишвалнавайбуруз. Ада (Аллагьди) лагьана: “Ва кафирвал авурбурузни (абурукай) бес, За адазни няметар ишлемишдай мумкинвал гуда са тIимил, ахпа За ам ЦIун азабдиз мажбур ийида”. Ва гьикьван пис “хтана акъваздай чка” я (ам)!
(КьатI ама)
Таржума авурди – Ямин Мегьамедов,
диндин рекьяй алим
