26-июлдиз Дагъустандин Кьил Владимир Васильев бажарагъ авай аялрихъ галаз гуьруьшмиш хьана, абурун арада Вирироссиядин школьникрин олимпиададин эхиримжи этапдин призерар, илимдин рекье авай жегьилрин Вирироссиядин “Гележегдиз кам” форумдин гъалибчияр ва 2019-2020- кIелунин йисан “Вахт алатуниз килиг тавуна” сочиненийрин Вирироссиядин конкурсдин гъалибчи авай.
Дагъустандин уьмуьрда хъсанвилихъ дегишвилер хьунин карда акьалтзавай несилдин важиблувал къейд авуналди, Владимир Васильева абуруз инсан чIехи хьунин къайдайрикай, регион вилик финин рекьерикай вичин фикирар лагьана. Дагъустандин Кьили гьам федеральный дережада кIвалахдайла, гьамни Дагъустандиз атайдалай гуьгъуьниз вичин уьмуьрдай мисалар гъана. Бажарагълу жаванриз неинки Дагъустандай масанриз физвай жегьилрин кьадар тIимил хьуникай, гьакIни гележег авай, чпин вахтунда республикада кIвалах жагъун тавур дагъустанвияр элкъвена хтун патал тухузвай кIвалахдикайни чир хьана. Ихьтин проект “Зи Дагъустан” тIвар алаз тухвай кадрияр хкядай ачух конкурс хьана. Ам себеб яз, конкурсда иштиракай 11 агъзур иштиракчидикай 50 гъалибчи хкяна — абурукай 29 кас регьбервал гудай жавабдар къуллугърал тайинарна.
В.Васильеван гафаралди, регионда кадрияр хкягъунин политика алакьунар авай, виридалайни бажарагълу ксар тайинарунихъ элкъуьрнава.
Жегьил дагъустанвийрин гъалибвилерал вичи дамахзавайди къейд авуналди, региондин регьберди лагьана: “Куь агалкьунар педагогвилин къурулуш хъсан хьунин нетижа я. Налогар кIватIна, алава такьатар хьанмазди, чна хуьруьн чкайриз кIвалахиз финал рази хьайи 50 муаллим гьевеслу авун патал 50 миллион манат чара авунва.
Алай йисуз чна и макьсадар патал чара ийидай такьатрин кьадар артухарда, федеральный куьмек агакьнава, гьеле 140 муаллимдиз ихьтин мумкинвал жеда. Зун муаллимрин хизандай я. Школадиз жегьил муаллим атайла, ученикрин патай кIелуниз итижлувал хкаж жедайдини заз чизва”.
Школьникрихъ галаз суьгьбетдайла, Владимир Васильева вичиз абур чпин мурадрихъ агакьна кIанзавайди къейдна, кьулухъ чIугун тавун меслятна.
Ада машгьур келима рикIел хкана: “КIелун фагьум-фикир галачиз менфятсузди жеда, фикир лагьайтIа, кIелун галачиз хаталу я”. Аялриз ада исятда регионда кьиле физвай крариз фикир гуниз эвер гана.
Вичин нубатда вице-премьер — образованидин ва илимдин министр Уммупазил Омаровади регионда бажарагълубуруз хъсан шартIар тешкилун патал активный кIвалах мукьвара Дагъустандин вице-премьердин къуллугъдилай элячIай, са тIимил вахт идалай вилик Россиядин просвещенидин министрдин заместителдин къуллугъдал тайинарнавай Екетерина Толстиководи башламишайди къейдна. Къе и кIвалах давам жезва. Гуьруьш куьтягь жедайла, РД-дин Кьили Вирироссиядин конкурсда виниз тир нетижайрай бажарагълу школьникриз чухсагъул лагьана.
«Лезги газет»
