Яргъалди давам хьайи къати марфари Кьурагь райондин яшайишдин объектризни, хсуси саларизни еке зиянар гана. Райадминистрациядин пресс-къуллугъди хабар гайивал, гзафни-гзаф райондин 23-нумрадин ДЭП-дин Кьасумхуьр-Кьурагь-Хвереж рекьин участокдиз хасаратвилер хьана.
Республикадин метлебдин Штул-Кьурагь рекьин участокдални селдин кьар акьалтна. Пакадин юкъуз михьи хъувур рекьер мад сеферда селлерин хурук акат хъувуна: рекьин винел пад чиргъер, къванер квай хурхадив ацIана. ТIебиатдин завалди рехъ вахтуналди кIевирна.
Кьурагьай Гелхениз фидай рекьин сивел алай муькъуьн дестекривай юргъвадиз дурум гуз хьанач. Куквазрин хуьруьз гьахьдай чкадал алай къванцин куьгьне муьгъни чкIидай гьалда ава. Кьурагь-Усугъ-Хвереж рекьерин участокда авай къванцин куьгьне муьгъ тамамвилелди ацахьна.
Гелхен, Квардал, Укуз, Хвереж хуьрериз фидай улакьрин алакъаяр патал вахтуналди туькIуьрай турбайрин муьгъни кьвед лагьай сеферда ахмиш хьайи селди къайдадикай хкудна. И жуьредин зиянар Шимихуьруьн, Хпуькьрин, Урсунрин, Хпежрин мулкаризни тIимил хьанач.
Кьурагь райондин кьил Замир Азизован къарардалди зиянар хьайи чкаяр гуьнгуьна хтунин рекьяй оперативный штаб арадал гъанва. Директор М.Агьмедов кьиле аваз, рекьерин участокдин вири къуллугъчияр чIур хьайи чкаяр туькIуьр хъувунал алахънава. Абурулайни гъейри, хасаратвилер хьайи чкайрал 12-дав агакьна техникади кIвалахзава. Ремонтдин кIвалахрал къуншидаллай Сулейман-Стальский райондин автогрейдерни желбнава.
Чи мухбир
_________________________________________________________________________________________________________________
Куьмек герек я
ТIебиатдилай зурба художник, архитектор авач ва якъин адан хура акъвазизни жедач. ТIебии къуватри ара-ара чилин акунар вичиз кIанивал дегишарда…
ИкI, 21-22-июлдиз яргъал чIугур къати марфар къуникди Ахцегь районда вацIар хкаж хьана, кIамарай гурлу селлер атана. Нетижада халкьдин майишатдиз зиянар хьана. Кьилди къачуртIа, Мегьарамдхуьр-Усугъчай-Ахцегь-Рутул шегьре 4-5 сятда кардикай хкатна (энгел тавуна, залан техника желбуналди, рехъ ачухнатIани, гилани къванер аватунин хаталувал ава). Ахты-чай вацIун дереда Фияз, Гутумиз, Хинез фидай рекьер са шумуд чкадилай ацахьна. Хинерин хуьруьн муьгъ тухуникди 2 агъзурдалай гзаф агьалияр яшамиш жезвай дагълух хуьр “чIехи чиликай” тамамвилелди хкатна. Райцентр ва мад 5 хуьр (районэгьлийрин 80 %) хъвадай целди таъминарзавай “Лекье-дере — Ахцегь” цин линиядин кьилин имарат ремонт ийиз техжер тегьерда чкIана ва икI мад.
Гьа юкъуз Осман Абдулкеримов кьиле аваз КЧС-дин комиссиядин заседание эверна ва республикадин руководство, Дагъустандин МЧС-дин ГУ, транспортдинни рекьерин майишатдин Министерство хабардарна. Паталай къведай куьмекдал вил алаз акъваз тавуна, районди вичин хсуси къуватралди 68 километрдин рекьер селлерикай михьи хъувуна, Цуругърин ва Хуьруьгрин хуьрериз рехъ ачухна.
Цин линиядин кьилин имаратдин, Ахты-чай вацIун дередин ва вацIу тухванвай Хинерин муькъуьн гьалар чкадал ахтармишун патал анриз махсус комиссия ракъурна. Адан гьисабрай, райондин экономикадиз тахминан 5 миллион манатдилай гзаф зарар хьанва. Гьукуматдин куьмек авачиз бязи рекьерин участокар, цин линиядин кьилин имарат ва Хинерин муьгъ туькIуьр хъийиз жедач. Идан гьакъиндай “Ахцегь район” МР-дин кьил О.М. Абдулкеримован къул алаз РД-дин Гьукуматдин Председатель А.А.Здуноваз чар ракъурнава. Районэгьлийрин вил республикадин куьмекдал ала.
Месэладин гьакъиндай 25-июлдиз Осман Абдулкеримован регьбервилик кваз райондин КЧС-дин гегьенш заседание хьана. Адан кIвалахда райондин са жерге идарайринни карханайрин руководителрилай ва СП-рин кьилерилай алава, РД-дин Халкьдин Собранидин депутат Рафик Асланбегова, райсобранидин председатель Абдулкерим Палчаева иштиракна.
ТIебиатдин бедбахтвилерин чIуру нетижаяр вахтунда алудунин жигьетдай “Лекье-дере — Ахцегь” цин линиядин кьилин имаратдал фена хтанвай райадминистрациядин кьилин заместитель Роберт Гьамзаеван, ГО ЧС-дин ва ЕДДС-дин управленидин начальник Мегьамед Моллалиеван, УЖКХ-дин руководитель Фиридин Магьмудован ва эцигунардай управленидин (УСЕЗ) начальник Сердер Моллалиеван малуматрихъ яб акалайдалай кьулухъ О.М. Абдулкеримова УЖКХ-дин руководителдални Самур дередин СП-рин кьилерал цин линия кардик ахкатдалди жемят, машиндалди гъиз, хъвадай целди таъминарун тапшурмишна. И кар патал анал цин махсус график тайинарна. Алай вахтунда цин кьилин имарат ремонт хъувунив эгечIнава.
Дашдемир Шерифалиев
