Баришугъвал теклифзава
Эрменистандин премьер-министр Н. Пашиняна Азербайжандиз яракьлу къуватар ишлемишуникай кьил къакъудуниз эвер гана. Идакай «Новости Армении» чешмеди хабар гузва.
Пашиняна гьукуматдин заседанидал Эрменистандинни Къарабахдин сад тир хатасузвилин система мягькемарунин чарасузвал авайдакай малумарна.
Пашинянан гафаралди, эгер Баку гьазур ятIа, кьве терефдин арада кьиле фидай рахунрихъ еке метлеб жеда. Ада алава хъувурвал, Азербайжанди инсанар яшамиш жезвай хуьрериз гуьлле гана. “Бакудиз яракьар маса гузвай уьлквейриз чир хьун лазим я хьи, а яракьар ислягь уьмуьр кьиле тухузвай инсанриз акси яз ишлемишзава”, — къейдна ада.
Эрменистандинни Азербайжандин арада авай сергьятдал ягъунар 12-июлдиз кьиле фена. А чIавалай инихъ кьве терефдини сада муькуьдак тахсир кутазва. Уьлквейрин арада Къарабах патал гьуьжетар кьиле физ 30 йис я.
Наразивилер
Белоруссиядин президент А.Лукашенкодин фикирдалди, гьар са дяве куьчейра арадал къвезвай наразивилин серенжемрилай, майданрилай башламиш жезва. Адан гафар «БЕЛТА» чешмеди раижна.
Лукашенкодин гафаралди, гьазурнавай махсус аскеррикай ибарат тир армиядин подразделение гьамиша аваз хьун герек я. “Гьелбетда, яракьлу къуватар кардик кутун лазим авай кар туш, амма инлай кьулухъ вуч арадал къведатIа чидач”.
Белоруссияда 9-августдиз президентдин сечкияр кьиле фида. Оппозициядин сиясатчийрин геле къекъвезва лугьуз, уьлкведа наразивилин гегьенш акцияр кьиле физва. Ихьтин серенжемар блогер С.Тихановский ва Белгазпромбанкдин виликан кьил Бабарико дустагъ авурдалай кьулухъ арадал атана.
Мад лув гуда
1-августдилай Россияда международный авиациядин алакъаяр гуьнгуьна хутазва. Идакай премьер-министр Михаил Мишустина малумарна.
Адан гафаралди, авиациядин алакъаяр арадал хкунин къарар кьабулдайла, гьукумдарри тlугъвалдин гьаларал, арадал атанвай статистикадал амалнава. Россиявийривай Туьркиядиз, Великобританиядиз ва Танзаниядиз физ жеда.
Багьа авунин себебар
Интернетдин рекьяй пешекар Д.Мариничева ихтилатайвал, Россияда интернетдин къимет багьа жеда. Адан фикир “Лента. ру” чешмеди раижзава.
Пешекардин гафаралди, интернетдин къимет дегиш хьуниз “Яроваядин законди” (террориствилиз аксивалунин закон), манатдин курс агъуз аватуни ва коронавирусдин тIугъвалди таъсирзава. Къейдзавайвал, гьам тадаракрин, гьам сетдин къиметарни хкаж жеда. Алава хъувурвал, коронавирусдин шартIара инсанри интернетда вахт гзаф кечирмишзава.
Идалай вилик “Известия” газетди кIвалин интернетдин ва телевиденидин къиметар Россияда алай йисуз 15 процентдин хкаж жедайдакай хабар ганай.
Къадагъаяр мус алудда?
Россияда коронавирус себеб яз кардик кутунвай сергьятламишунин серенжемар тамамвилелди къведай йисан февралдиз къуватдай вегьин мумкин я. “Новости” РИА-ди хабар гузвайвал, ихьтин фикир уьлкведин здравоохраненидин министр М.Мурашкоди лагьана.
Идалай вилик ВОЗ-дин Россияда авай векил М. Вуйновича уьлкведа сергьят эцигунин серенжемар кардик кухтун мумкин яз гьисабнай. Адан гафаралди, эгер инсанри, талукь тир мензил хуьн тийиз, хатасузвилин маса къайдайрал амал тийиз ва, идахъ галаз сад хьиз, вирус акатзавайбурун кьадарни арух жез хьайитIа, сергьят эцигунин серенжемар мад кардик кухтуниз мажбур жеда.
Чара кас я лугьузва
Белоруссиядин вини дережадин технологийрин паркунин виликан регьбер В.Цепкалоди Forbes-диз гайи интервьюда Лукашенко белорусар патал чара инсан я лагьана.
В.Цепкалодиз Белоруссиядин президентвилин сечкийра иштиракиз кlанзавай, амма адан кандидатура алудна. Сиясатдин месэлайрин патахъай вичин геле къекъвезва лугьуз, ам Россиядиз катна.
Ада Лукашенкодик, гуя конституция, къанунар чlурзава лугьуз, тахсир кутазва, амма тайин делилар гъизвач.
Малум тирвал, Белоруссияда президентдин сечкияр 9-августдиз кьиле фида. Лукашенкоди 6-сеферда иштиракда.
Векилхана амукьдач
Китайдин Чэнду шегьерда авай США-дин генеральный векилхана кlевирунин гьакъиндай малумарнава. КНР-дин МИД-дин малумат “Новости” РИА-ди раижна.
Китайда авай дипломатиядин векилханади 27-июлдилай кlвалах хъийидач. Адал алай США-дин милли пайдахни алуднава, къуллугъчийри дарамат азад хъувунва. Чэнду шегьерда США-дин векилхана 1985-йисалай кардик хьана.
«Лезги газет»
