Гад чуьлдин кIвалахрин къизгъин вахтарикай сад я. ИкI, алай вахтунда Сулейман-Стальский райондин хуьруьн майишатдин карханайри, лежбервилинни фермервилин майишатри ва арендаторри уьзуьмлухрани багълара агротехникадин серенжемар кьиле тухузва, общественный мал-къара патал алафар гьазурзава, гад агудзава, халияр кIватI хъийизва.
— Халияр гьасилун райондин хуьруьн майишатдин цIийи хел я, — лугьузва райондин хуьруьн майишатдин ва суьрсетдин управленидин начальник Мегьамедзагьид Бабаева. — ЧIехи майданра халияр цаз тахминан 5-6 йисан вилик башламишнай. Алай йисуз халияр 135 гектардин майданра цанва. Ида къалурзава хьи, чи шартIара халийрин хъсан бегьер кIватI хъийиз жезва, инсанрихъ и рекьяй хъсан тежрибани хьанва.
Малум хьайивал, районда бустандин няметар асул гьисабдай “Зардиян” лугьудай чкада цанва. И кардал ЛПХ-яр, ИП-яр ва арендаторар машгъул я. Абурукай сад арендатор Надир Къадимов я. Адан сал ЦIийи Макьарин хуьруьн мулкуна ава, ада 4 гектар кьунва.
— Халияр гьасилунин карда за чкадин миянардай шейэрикай менфят къачузва, — лугьузва Надир Къадимова. — Яд за, тухвана, “стIал-стIал” къайдада гузва. Чи шартIара са гектар салай саки 60 тонндив агакьна халийрин бегьер вахчуз жеда.
Халияр гьасилзавайбуру лугьузвайвал, райондин мулкуна накьвадин къурулуш хъсанди, рагъ авай йикъарни гзаф я. Ида халийриз хъсан дад, артухан кIуьгьуьвал гузва, ихьтин халийрихъ муьштерийрин патай еке игьтияжни ава.
Мегьамедзагьид Бабаева алава хъувурвал, районда гьасилзавай хъсан еридин, экологиядин жигьетдай михьи тир халияр чкадал маса гузва, абуру гьакI Дагъустандин ва Россиядин базарра конкуренцияни арадал гъизва.
Хазран Кьасумов
