Россиядин Федерациядин Президентдин сечкийрин югъ алукьдалди 66 югъ ама. Россиядин ЦИК-дин председатель Элла Панфиловади малумарайвал, президент жез кIанз документар вугай ксарин кьадар 67-дав агакьнава. Абурукай 21 кас политический партийрин векилар я, 46 касдини чпи-чеб къалурнава. Гьелбетда, абур ЦИК-ди вири регистрация авунач.
Документар вугайбурун арада Дагъустандин муфтийдин уьмуьрдин юлдаш, СМИ-рихъ, общественностдихъ галаз алакъаяр хуьнин рекьяй советник, “Ислам” журналдин кьилин редактор, исламдин ва светский изданийрин медиахолдингдин регьбер Айна Гьамзатовани авай. ЦИК-дин член Евгений Шевченкоди малумарайвал, А.Гьамзатовадин терефдарри собрание законди истемишзавай йикъарилай геж тухвана. ГьакIни ада документрик вичи, уьмуьрдин юлдашди ва аялри авунвай чIехи харжийрин гьакъиндай справкаяр кутунвачир, кандидатдин тереф хуьзвайбурукай 327 касди кIвалахзавай чкаяр къалурнавачир. Гьа и делилар себеб яз, Айна Гьамзатова президентвиле кандидат яз регистрация авуначалда.
8-январдиз ЦИК-ди чпи-чеб къалурнавай ксар регистрация авуна акьалтIарна. 46 касдикай 13 кас регистрация авунва. Партийрин патай майдандиз экъечIзавай ксарихъ 12-январдалди ЦИК-диз документар вугудай мумкинвал ама.
Президентвиле кандидатри сечкийрин вилик таблигъат тухун патал пулар кIватIдай махсус счетар ахъайнава. Россиядин ЦИК-дин делилралди, гьелелиг кандидатрин счетра 700 миллиондив агакьна пул хьанва. Виридалайни гзаф Владимир Путинан счетда ава — 400 млн манат. И пул “Сад тир Россия” партиядин, партия финансироватзавай регионрин са шумуд фондунин тIварунихъай атанва. Икьван чIавалди адакай къулар кIватIунин, таблигъатдин материалар акъудунин серенжемриз 13 млн манат харжнава.
В.Путиналай гуьгъуьниз гзаф пул (200 млн.) счетдиз атанвай кандидат Владимир Жириновский я. Адалай гуьгъуьна бизнес-омбудсмен Борис Титов — 20,7 млн, телеведущий Ксения Собчак — 19,4 млн, “Яблоко” партиядин регьбер Григорий Явлинский — 15 млн, Кострома областдин думадин депутат Владимир Михайлов — 200 агъзур, “Яшайишдин реформайрин партиядин” векил Станислав Полищук -100 агъзур, тележурналистка Екатерина Гордон — 50 агъзур — ава.
Виридалайни кесибрин жергеда гьатнава: Тамбов областдин думадин депутат Роман Худяков — 30 агъзур, Россиядин государственный алишверишдинни экономикадин университетдин ректор, политический ва общественный деятель Сергей Бабурин — 20 агъзур, “Мортадель” компаниядин вице-президент Эльвира Агурбаш — 8 агъзур ва Москва областдин Ленинан тIварунихъ галай совхоздин директор Павел Грудинин — 1066 манат.
РикIел хкин, уьлкведа сечкидин кампания 2017-йисан 18-декабрдиз башламишна. Алай йисан 8-январдиз ЦИК-ди чпи-чеб къалурнавайбурувай документар кьабулна куьтягьна. ЦIуд йикъан муддатда абуруз тамашда ва и кас Россиядин президентвиле кандидат яз регистрация ийидани, ийидачни къарар кьабулда. Президентвилин сечкияр алай йисан 18-мартдиз кьиле фида.

Нариман Ибрагьимов