Чи уьлкведа «Вирироссиядин халкьдин фронт” (ОНФ) тIвар алай гьерекат кардик акатна ругуд йисалай алатнава. Ам арадал гъайиди ва адан кьиле акъвазнавайди Россиядин Президент Владимир Путин я.
Гьерекатди и йисара вич государстводин метлеб авай кьетIен месэлаяр къарагъарзавай ва абур гьялдай рекьер жагъурзавай зурба тешкилат яз къалурнава. ОНФ-ди 2011-йисуз Дагъустандани сифте камар къачуна. Алай вахтунда чи республикада ОНФ-дин жегьилрикай ибарат тир хилени вичикай хабар гузва. Гьерекатди кар алакьдай, бажарагъ, алакьунар авай, Ватандихъ рикI кузвай жегьилар саднава. Абурун арада Сулейман-Стальский райондин КIварчагърин хуьряй тир Равидин Абдурагьимовни ава. Ам гьакIни Дагъустан Республикадин жемятдин “Кьиблепатан Дагъустандин жегьилрин союз” тIвар алай тешкилатдин председатель ва Махачкъала шегьердин Собранидин жегьилрин парламентдин депутат я.
Алатай йисан 18-19 декабрдиз Москвада “Гьерекатрин форум” тIвар алаз ОНФ-ди тешкилнавай чIехи мярекат кьиле фена. Ана Дагъустандин патай векил яз Равидин Абдурагьимовни авай. Мярекатдин сергьятра кьегьал лезги хциз Владимир Путинахъ галаз суьгьбетдай мумкинвални хьана. Ада уьлведин регьбердиз Дагъустандин халкьдихъ авай месэлайрикай ва ОНФ-да авай жегьилри кьиле тухузвай кIвалахрикай лагьана. Президентди чи ватанэгьлидин ихтилатрихъ дикъетдивди яб акална ва ада чIугвазвай зегьметдиз еке къимет гана.
Къейд ийин хьи, форумдин майдандал кьиле фейи “Дегишвилер гуьзлемишмир!” “Дегишвилер яратмиша!” конкурсда Равидин Абдурагьимова гъалибвилин чка кьуна ва 100 агъзур манатдин кьадарда авай сертификат къазанмишна.
Ахцегьви Сулейман
