“Зи Дагъустан — зи рекьер” инвестпроектдин сергьятра аваз республикадин 49 муниципалитетда санлай 149 километрдин рекьер (вири 1 млн. кв. метрдилай гзаф) ремонтзава. И мураддиз 771 млн. манат пул ахъайнава. Халкьдин яшайишдин метлебдин важиблу и проектдай Ахцегь районда 1350 метрдин рекьера къир цанва, санлай 11, 500 кв. метрдин майдан аваданламишнава, хейлин чкаяр туькIуьр хъувунва. Ремонтрин кIвалахар, подрядчик яз, Мегьарамдхуьруьн ООО “Югагропромдорстрой” карханади кьиле тухвана ва рекьер къайдада хутунин кIвалах алай вахтундани давам жезва.
Проектдин заказчикдин векил, Ахцегь МБУ УСЕЗ-дин (эцигунрин сад тир заказчикдин Управление) начальник Сердер Моллалиева къейд авурвал, рекьера къир цунин кIвалахар, технологиядин вири къайдаяр вилив хуьналди ерилудаказ ва тайинарнавай вахтара кьиле тухванва: рекьерин бине мягькемарна хьиз са шумуд къат къир цазва; гьадахъ галаз санал Ахцегьрин хуьруьн администрациядин ва райондин УЖКХ-дин къуватралди рекьерай тухванвай цин турбайрин система туькIуьр хъувунва. Хуьруьн къенепатан рекьер чиргъ вегьиз дуьзмишзава. И кIвалахрал гьар жуьредин махсус техникани гваз цIудралди пешекарарни фялеяр желбнава.
Алай вахтунда, Осман Абдулкеримован регьбервилик кваз, райадминистрацияди кьетIен дикъет “Зи Дагъустан — зи рекьер” проектдай чкадин дережадин, яни гравийдик квай рекьер туькIуьр хъувуниз гузва. Проектдинни сметадин документацияр гьазурзава, подрядный карханайрин арада конкурс тешкилзава ва икI мад. Разивилелди лугьун, 2019-йисалай эгечIна районда гузвай транспортдин налогрин пул муниципальный бюджетдиз хквез хьуникди (и карди районэгьлийри транспортдин налог вахт-вахтунда гунизни хъсан таъсирзава) рекьер къайдадиз хкидай фондунин мумкинвилер хейлин артух я. КIвалахрин къиметдикай рахайтIа, аукцион кьиле тухунин нетижада и месэладиз 6 391 175 манат пул ахъайнава. ИкI, Ахцегьа Ленинан ва Герейханован тIварарихъ галай куьчейрин участокар ва Байрамован шегьре асфальтламишунин, гьакI бязи куьчейриз чиргъ вегьинин нетижада райцентрадин акунар хъсанвилихъ дегиш жеда.
Эхь, чи водителри зурба машинар алатай девирдин пис рекьерай йигиндиз гьалзавайвиляй аварияр жезва. И месэла къайдадиз хкун, ДТП-рин вилик пад кьун патал къе чаз кутугай рекьер чарасуз я. Абур хьун патал райондин рекьерин участокдин кархана (ДЭП-4) кIвачел ахкьалдарунихъни, гьелбетда, еке метлеб ава. И кардал райондин руководство машгъул тирди чиз, чна адаз агалкьунар хьун тIалабзава.
Дашдемир Шерифалиев
