7-июлдиз РД-дин Гьукуматдин Председатель Артем Здунова интернетдин алакъадин куьмекдалди Оперативный штабдин нубатдин заседание кьиле тухвана. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Санитариядин жигьетдай республикада авай гьаларикай ва тIугъвалдин вилик пад кьун патал кьабулзавай серенжемрикай Дагъустандин Роспотребнадзордин Управленидин регьбер Николай Павлова суьгьбетна.
Адан гафаралди, 7-июлдиз авай делилралди, республикада лабораторийра тестикьарнавай коронавирусдик азарлу 8232 кас регистрация авунва.
Н.Павлова къейд авурвал, тIугъвал акатун тIимил жезвайди ва республикада коронавирусдихъ галаз алакъалу яз тайинарай сергьятар алудунин кьвед лагьай этап алукьнавайди фикирда кьуна, са жерге объектривай, анра зегьмет чIугвазвайбурук лабораторийрин шартIара коронавирус квани, квачни ахтармишна, кIвалах хъийиз гьазурвал акуртIа жеда. Ихьтин объектрик алишверишдин майданар 800 кв.м. гзаф туширбур, куьчедин базарар акатзава. Мадни, аялрин бахчайривай, мектебривай, колледжривай ва вузривай кIвалах кардик кухтаз гьазур хьайитIа жеда.
Н.Павлован фикирдалди, спортсменри, виликдай хьиз, михьи гьавадал тренировкаяр тухунихъ, яратмишдай коллективри репетицияр тешкилунихъ хаталувал авач. Анжах и гьерекатра иштиракзавай вирибуру лабораторийра анализар вахкун герек я.
Махачкъала шегьердин кьил Салман Дадаева республикадин меркезда авай алишверишдин центраяр ахъаюнин теклиф гана. Анрин сагьибар кIвалахдай чIавуз Роспотребнадзордин вири къайдайрал амал ийиз гьазур я.
Артем Здунова и центраяр ачухун патал Махачкъаладин администрациядиз Роспотребнадзордихъ галаз санал алишверишдин кархайра ахтармишунар кьиле тухун ва кIвалах кардик кухтун патал гьазур ятIа чирун тапшурмишна.
«Лезги газет»
