Кьисметди дуьньядин жуьреба-жуьре пипIериз акъуднавай чи ватанэгьлийрикай, абурун кIвалахрикай, уьмуьрдин шартIарикай «Лезги газетда» макъалаяр мукьвал-мукьвал чапзава. Алукьнавай 2018-йисузни чна «Чи ватанэгьлияр – гьар сана» рубрикадик кваз газет кIелзавайбур Дагъустандилай къецепата жавабдар къуллугъар тамамарзавай лезгийрихъ галаз танишарун давамарда. Ихьтинбурукай сад Россиядин МЧС-дин Тульский областда авай Кьилин управленидин начальникдин сад лагьай заместитель Агъакишиев Апрель Агъакишиев я.

1977-йисуз Ахцегь райондин Смугъулрин хуьре дидедиз хьайи ам Камышинский высший военный командный инженерринни эцигунардайбурун училищедиз гьахьна. Училищедин къурулушда дегишвилер кьиле финикди, ада кIелунар Тольяттидин военный инженерно-технический университетда давамарна ва 1998-йисуз анаг акьалтIарна.

Вуздилай кьулухъ чи ватанэгьли къуллугъун патал Камчаткадиз рекье туна. Лейтенантдин чинда аваз рекьерин кьилдин взводдин командирдин къуллугъдал тайинарай адакай, са кьадар вахт арадай фейила, къутармишдайбурун 1043-нумрадин центрадин штабдин начальник хьана.

2006-йисуз Москвада В.В.Куйбышеван тIварунихъ галай военно-инженерный академия акьалтIарай ам Россиядин МЧС-дин Центральный регионрин центрадиз рекье туна. Апрель Агъакишиева ина жуьреба-жуьре къуллугъар тамамарнава, гьа жергедай яз, управленидин начальникдин къуллугъни.

Къейд ийин хьи, чи викIегь ватанэгьлиди Центральный Федеральный округдин мулкарал арадал атай хейлин бедбахтвилер арадай акъудунин серенжемра иштиракна.

2016-йисан августдин вацра Апрель Агъакишиев Россиядин МЧС-дин министрдин приказдалди, Россиядин МЧС-дин Тульский областда авай Кьилин управленидин начальникдин сад лагьай заместитель яз тайинарнава. Ам ведомстводин ва государстводин шабагьрин сагьиб я. Адан хизанда са руш тербияламиш жезва.

Чи корр.