26-декабрдиз Хасавюрт райондин Къурушрин хуьре шад гьалара Дагъустандин МЧС-дин цIай хкадардайбурун кьилдин десте (пожарная часть) ачухна. И мярекатда РД-дин Гьукуматдин Председателдин везифаяр вахтуналди тамамарзавайдан заместитель Рамазан Жафарова, РД-дин МЧС-дин министр Нариман Къазимегьамедова, Хасавюрт райондин кьил Жамбулат Салавова, цIай хкадардайбурун кьилдин дестедин дарамат эцигай карханадин генеральный директор Нурали Мегьмандарова, хуьруьн жемятди, патарилай хтанвай мугьманри иштиракна.
Къейд ийин хьи, цIай хкадардайбурун кьилдин дестедин дарамат хуьруьн кьилихъ галай саки са гектардин майдандал экIя хьанва. Аниз физвай гьяркьуь рекье къир цанва, объект лагьайтIа, элкъвена ракьун тIваларикай туькIуьрнавай жугъундалди кIевнава, чка-чкадал къелемарни цанва. Са гафуналди, инаг хъсандиз аваданламишнава.
Мярекат Хасавюрт райондин кьилин сад лагьай заместитель Вагьид Къасимова ачухна ва сифте гаф райондин кьил Жамбулат Салавоваз гана. Ада вичин рахунра цIийи ачухзавай объектдин важиблувал къейдна ва хуьруьн жемятдиз, вири иштиракчийриз и лишанлу вакъиа мубаракна.
— Зи хуьруьн играми жемят, атанвай мугьманар, — лагьана гуьгъуьнлай рахай Рамазан Жафарова. — Сифте нубатда за квез виридаз и шад вакъиа мубаракзава. ЦIай хкадардайбурун кьилдин дестедин дарамат Къурушдал эцигунихъ еке метлеб ава. Чи хуьр кьве райондин — Хасавюрт ва Бабаюрт – мулкарин юкьва ава. И кар фикирда кьуна, агьалийрин яшайиш патал гзаф важиблу объект ина эцигнава. ЦIай хкадардайбурун куьмек садазни садрани герек тахьурай. Амма уьмуьрда тежезвай жуьредин дуьшуьшар авач. Республикадин руководстводин вилик акъвазнавай кьилин месэлайрикай сад Дагъустандин агьалийрин хатасузвал таъминарун я. Къуй чи уьмуьрда рикI тIардай дуьшуьшар садрани тахьурай…
Къурушвийриз цIай хкадардайбурун кьилдин десте ачухун Дагъустандин МЧС-дин министр Нариман Къазимегьамедовани тебрикна.
— Гьуьрметлу зи ватанэгьлияр! Къе и вакъиа тарихда амукьдайбурукай сад я, — къейдна ада. – Къурушдал и объект эцигунин тереф РД-дин Гьукуматдини хвена. Заз и месэладал кIукI гъунин карда куьмекар гайи Хасавюрт райондин кьил Жамбулат Салавоваз, эцигунардай «Яры-Дагъ» фирмадин генеральный директор Нурали Мегьмандароваз, къенин югъ мукьва авун патал зегьмет чIугур гьар са касдиз сагърай лугьуз кIанзава. Лагьана кIанда, хуьре цIийи объект арадал атунин нетижада 21 хизандиз кьил хуьдай мумкинвилерни пайда хьанва. Къуй чи уьмуьрда пашман, хаталу легьзеяр садрани тахьурай. Виринра ислягьвили, бахтлувили агъавалрай…
Къурушрин хуьруьн агъсакъалрин Советдин председатель Вердихан Вердиханова хуьруьн общественностдин тIварунихъай Къурушдал цIай хкадардайбурун кьилдин дестедин дарамат эцигуник пай кутур вирибуруз чухсагъул малумарна.
Мярекатдин эхирдай Рамазан Жафарова, Нариман Къазимегьамедова ва Жамбулат Салавова объект ачухунин кьилин ярж – яру лент атIана.
Къейд ийин хьи, ЦIийи Къурушрин хуьре авай цIай хкадардайбурун 60-нумрадин кьилдин дестедин начальник яз майор Шейх Шейхов тайинарнава.
Гьажи Къазиев
