27-декабрдиз Мегьарамдхуьруьн райондин Самур хуьруьн агьалияр Москвадай атанвай Гьукуматдин делегациядихъ галаз гуьруьшмиш хьана. Мярекатда Россиядин эцигунрин ва ЖКХ-дин министрдин сад лагьай заместитель Леонид Ставицкийди, и министерстводин махсус проектриз килигдай отделдин руководитель Руслан Исаева, РД-дин Гьукуматдин Председателдин везифаяр вахтуналди тамамарзавайдан Сад лагьай заместитель Рамазан Алиева, Кьиблепатан Дагъустанда РД-дин Кьилин везифаяр вахтуналди тамамарзавайдан векил Энрик Муслимова, Мегьарамдхуьруьн райондин кьил Фарид Агьмедова, Дербентдин мэр Малик Баглиева, РФ-дин эцигунрин ва ЖКХ-дин министерстводин ФГПУ-дин кьиблепатан филиалдин регьбер Руслан Асланова, РД-дин тIебиатдин ресурсрин ва экологиядин министрдин везифаяр вахтуналди тамамарзавайдан заместитель Шамил Жамалова ва масабуру иштиракна. Абуру Дербент шегьер целди таъминарунин ва Самурдин тама къуяр эгъуьнин месэлаяр веревирдна.
Къейд ийин хьи, Дербентдин агьалияр целди таъминарун патал Самурдин водовод эцигунин месэладиз неинки са Дагъустандин, гьакI Россиядин Гьукуматдани килигна. Мадни башкъа, Самурдин месэладин патахъай уьлкведин Президентди талукь органриз кьилдин тапшуругъарни ганай. Леонид Ставицкийди къейд авурвал, Владимир Путина и месэла ачухдиз, авай гьалар вири терефрихъай ахтармишна, хуьруьн агьалийрин иштираквал аваз, абурун теклифар ва тIалабунар фикирда кьуна, гьялунин буйругъ ганва.
Чкадин агьалийри Россияда мад санани авачир надир Самурдин там хуьнин жигьетдай чпихъ авай фикирар раижна, там терг хьунал гъидай себебрикай лагьана. «Там хвена кIанда. ТIебиат кIанзавай гьар са кас халис ватанперес я, ам такIанди – Ватандин хаин», — малумарна самурвийрикай сада. Самур хуьруьн агьалийри гьакIни хци месэла гьялун патал яргъай атанвай мугьманриз сагърай лагьана.
«Чна гьазурнавай проектдин тереф вири патари хуьдайдак за умуд кутазва. И икьрардин кар алай делилрикай сад ам я хьи, чилин кIаник квай цин дережа агъуз аватай дуьшуьшда Дагъустандин Гьукумат водозабор эцигунин кIвалахар акъвазаруниз мажбур я. И шартI икьрарда кьетIендиз къейднава ва заз райондин ва Самур хуьруьн агьалийри им кьуру гафар хьиз кьабулна кIанзавач. Чна квехъ галаз санал цин дережадал гуьзчивал тухуда ва гьалар пис патахъ дегиш жез хьайитIа, гьасятда серенжемар кьабулда», — лагьана министрдин заместителди.
Леонид Ставицкийди Самур хуьре рекьерин инфраструктура, яшайишдин хел еримлу ийидай, аялрин бахчаяр, мектебар эцигдай планар авайди малумарна. Ада гьакIни самурвийривай и кIвалахар са гьихьтин ятIани маса къаст, макьсад аваз ийизвайбур хьиз кьабул тавун тIалабна.
Амма Самурдин агьалийри чеб и проект уьмуьрдиз кечирмишуниз акси тирди малумарна.
«Эхиримжи гаф чкадин жемятдинди хьун лазим я. Эгер куьн проектдиз акси ятIа, ам кардик кутунин игьтияжни авач. За вири месэлайрикай уьлкведин Президентдин Администрациядиз хабар гуда. Гьукумдихъ халкьдихъ галаз гьуьжетриз экъечIдай ниятар авач, чи везифа адан итижар, ихтиярар хуьникай ибарат я», — алава хъувуна Леонид Ставицкийди.
Агьмед Магьмудов
