РД-дин хуьруьн майишатдин ва недай суьрсетдин министерстводиз Дагъустандин тежрибайрин станциядин — Вирироссиядин набататрин генетикадин ресурсрин Вавилован тIварунихъ галай институтдин (ВИР) бинедаллаз Агрономдин мектеб арадал гъидай фикир ава. Ина, гуьзлемишзавайвал, республикадин агрономривай чпин пешекарвилин дережа вахт-вахтунда хкажиз жеда. Идакай идарадин пресс-къуллугъди хабар гузва.
Махсус школа арадал гъидай фикир авайдакай РД-дин хуьруьн майишатдин ва недай суьрсетдин министрдин заместитель Шарип Шарипова Дагъустандин тежрибайрин станциядин — ВИР-дин филиалдин Ученый советдин йиса садра жезвай заседанидал лагьана. Къейд ийин, заседанидин сергьятра аваз алимри Вирироссиядин набататрин институтдин дуьньядин коллекция хуьниз, ам артухаруниз ва ахтармишуниз талукь яз тухузвай кIвалахдиз талукь гьахъ-гьисабар ийизва.
Пешекарри къейдзавайвал, станциядин бинедаллаз гьар йисуз магьсулрин, майвайрин ва емиш гъидай культурайрин 10 000 чешне гьасилзава. И кIвалахдихъ галаз сад хьиз станциядал селекциядин эхиримжи агалкьунар ахтармишзава.
Санлай къачурла, майданра хуьруьн майишатдин культурайрин 17 жуьре гьасилзава: прунз, гьажибугъдаяр, ракъин цуьквер, къуьл, келемар, помидорар ва масабур.
«Лезги газет»
