15-майдилай Кьурагь райондин кьилин азарханада коронавирусдик начагъбур сагъар хъувун патал 10 койкадикай ибарат тир инфекцийрин отделение кардик кутуна. Азарлубуруз куьмек гун патал пешекаррикай ибарат бригадаяр арадал гъанвай. Абурун арада 1 духтур, 2 медсестра ва 2 санитарка авай. ТIугъвалдин вахтунда стационардай сагъар хъхьана кIвале­риз 11 кас хъфена.

Эхиримжи сагъ хъхьайди — Усарин хуьруьн агьали — азарханадай 26-июндиз рекье хтуна.  Мукьвара азарханадиз Кьурагь райондин кьил Замир Азизов, адан заместитель Махач Хариев ва райондин информациядин технологийринни печатдин центрадин руководитель Жаврудин Халикьов мугьман хьана.

Духтуррихъ галаз кьиле фейи гуьруьшдин сергьятра аваз Замир Азизова тIугъ­вал­дин вахтунда “яру зо­нада” кIвалахай медицинадин пе­рсоналдиз чухсагъул малумарна­.

“ТIегъуьн себеб яз арадал атай муракаб гьалара, куьне хсуси сагъламвални хаталувилик кутуна, коронавирусдиз акси женгина иштиракна, начагъбуруз алакьдай куьмекар гана, абур сагъар хъувуна. Куь зегьмет тарифдиз, баркалладиз лайихлу я”, — лагьана З.Азизова.­

Азарханадин кьилин духтур Азим Азимо­ва РД-дин здравоохраненидин министерст­водиз — тешкиллувилинни методикадин, са­гъар хъувунинни диагностикадин кIва­лах­да, райондин руководстводиз агьалийри республикада малумарай кьетIен гьаларин режимдин къайдайрал амал авунин карда куьмекар гунай, тIугъвалдиз акси женгина иштиракай вирибуруз сагърай лагьана.

Ф.Мегьамедова