Дагъустандин электросетрин къурулуш къайдадиз хкун патал — 30 млрд манат, Махачкъала шегьердин — 3,5 млрд манат пул герек жеда. Идакай “Россети Северный Кавказ” компаниядин генеральный директор Виталий Иванова хабар гана.

Адан гафаралди, алай вахтунда республикада электросетрин къурулуш къайдадиз хкунин жигьетдай кIвалахар кьиле тухузва. Проектированидиз талукь месэлаяр 2022-йисуз акьалтIарун фикирдиз къачунва.

“Россетрин” дестейри кьве йисан къене Дагъустанда кIвалахар кьиле тухун патал 10 млрд манат пул харждайвал я. 2018-2019-йисарин нетижайрал асаслу яз, республикада электросетрин къурулуш гуьнгуьна хтунин кIвалахриз 4 млрд манатдив агакьна пулдин такьатар чара авуна”, — лагьана В.Иванова.

Виликдай ТАСС-ди хабар гайивал, “Россети Северный Кавказ” компанияди Дагъустанда электросетрин къурулуш гуьнгуьна хтунин месэла кар алайди яз гьисабна ва эхиримжи са шумуд йисан къене и жигьетдай кIвалахар кьиле тухузва.

«Лезги газет»