30-июндиз Урусатдин Президент Владимир Путина уьлкведин са шумуд регионда коронавирус акатнавайбур сагъар хъувун патал оборонадин министерстводин медицинадин центраяр ахъаюниз талукьарнавай видеоконференция кьиле тухвана. “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, мярекатда Дагъустандин Кьил Владимир Васильева ва медицинадин идарайрин кьилин духтуррини иштиракна.
“Къе чун патал важиблу ва гьа са вахтунда шадвилин гьиссер кутадай вакъиа кьиле фена: Воронежда, Пензада, Каспийскда, Дербентда ва Хасавюрт райондин Ботаюрт хуьре оборонадин министерстводи эцигнавай медицинадин цIийи 5 центр ачухнава. Абур тIугъвалдихъ галаз женг тухунин карда герек къвезвай алай аямдин тадаракралди таъминарнава. Гьа са вахтунда цIийи идарайри регионра здравоохраненидин къурулуш мягькем хьунизни таъсирдайдал шак алач. Лагьана кIанда, 5-дакай 4 центр Дагъустандин ва Воронеждин областдин кьилерин тIалабуналди эцигнава.
ТIугъвалдин виридалайни четин макъамда уьлкведин муракаб гьалар арадал атанвай регионриз эцигунардайбур, герек къвезвай техника ва маса куьмекар рекье туна”, — къейдна Владимир Путина.
Президентди алава хъувурвал, коронавирус пайда хьайидалай кьулухъ кьве варз арадай фейила тIегъуьн акатнавайбур сагъар хъийидай 16 центр кIвалахдив эгечIна. Абур са гъвечIи девирда эцигна акьалтIарна. Центрайра, санлай къачурла, 4,5 агъзур кас сагъар хъувуна, 25 агъзурдав агакьна медицинадин рекьяй жуьреба-жуьре ахтармишунар кьиле тухвана. Мадни башкъа, Дагъустанда, Красноярскда, Забайкальеда алава мобильный 4 госпитални кардик кутунвай.
“ЦIийиз ахъайнавай центрайри коронавирусдихъ женг тухунин карда агалкьунар къазанмишдайдак за еке умудар кутазва. Женг давамарунив чун мукъаятвилелди эгечIзава. Чи гражданрин сагъламвал патал чна алакьдай вири куьмекар гуда, серенжемар кьабулда. Арадал атай муракаб гьалари здравоохраненидин къурулуш ва, санлай къачурла, уьлкве хаталувилериз дурум гуз гьазур тирди къалурна. И карда чна авай вири мумкинвилерикай менфят къачуна. КьетIендиз къейд ийин, коронавирусдин вилик пад кьун патал кьабулзавай серенжемар вири терефрихъай къимет гана кардик кутунва. Абур и хаталу макъамда сифте чкадал аламукьун герек я”, — лагьана уьлкведин Президентди.
“Тугъвалдиз акси женгина военный медицинадин къуллугъдин 18 агъзурдалай гзаф пешекарри иштиракна. Абуру, чпин сагъламвал хаталувилик кутуна, коронавирусдин есирда гьатнавай агьалийриз куьмекар гана, азардин къармахрай ахкъудна. Заз и кардик пай кутур гьар са духтурдиз, пешекардиз сагърай лугьуз кIанзава”, — алава хъувуна Владимир Путина.
Уьлкведин регионра центраяр эцигуникай оборонадин министр Сергей Шойгудини лагьана. Адан гафаралди, Президентди гайи тапшуругъдалди тайинарнавай вахтунда медицинадин цIийи идараяр эцигна акьалтIариз алакьна.
Дагъустандин Кьил Владимир Васильева Кеферпатан Кавказдин республикадин здравоохраненидин къурулушдиз куьмек гунай уьлкведин руководстводиз сагърай лагьана.
“Куь тапшуругъдалди Дагъустандиз чпихъ акьалтIай тежриба ва чирвилер авай духтуррин дестеяр атана. Четин макъамда регионда авай гьаларихъ галаз таниш хьун патал республикадиз РФ-дин здравоохраненидин министрдин кьве заместитель — Гриднев ва Фисенко мугьман хьана. Абуру чкадин духтурриз тIугъвалдиз акси женгина менфят къачуна кIанзавай къайдайрин, тежрибадин сирер ачухна ва абурун меслятрал Дагъустанда амални авуна”, — лагьана Владимир Васильева Владимир Путинахъ элкъвена.
РД-дин Кьили Дагъустан кIеве гьатнавай чIавуз куьмекар гунай оборонадин министр Сергей Шойгудиз, Роспотребнадзордин кьил Анна Поповадиз ва са жерге федеральный ведомствойрин кьилериз чухсагъул малумарна.
Видеоконференциядин сергьятра аваз, Владимир Васильева Урусатдин Президентдивай Азербайжандихъ галаз сергьятдал алай алачухрин пункт мад са вацра тун тIалабна.
“Владимир Владимирович, Куь тапшуругъдалди чна и кIвалах кьиле тухузва, сергьятдилай элячIзавайбурун кьадар артухарнава. Алай вахтунда Азербайжандани гьалар са акьван хъсанбур туш. Алачухрин пункт, жез хьайитIа, мад са вацра тунин игьтияж ава”, — лагьана республикадин Кьили. Президентди и месэладин патахъай вичин разивал къалурна.
Дагъустанда цIийиз ахъайнавай центрайрикай Каспийскдин, Дербентдин ва Хасавюрт райондин азарханайрин кьилин духтурри — Расим Рамазанова, Абдулкъафар Шихмегьамедова, Кавсарат Шуайбовадини чпин фикирар лагьана. Абуру къейд авурвал, цIийи центрайри регионда медицинадин хел вилик финиз таъсирда, чкадин агьалийриз медицинадин рекьяй виниз тир еридин куьмек гудай мумкинвилер тешкилда.
(Макъала куьруь авуна гузва.
Гегьеншдиз РД-дин Кьилин сайтдай кIелиз жеда)
Чи мухбир
