Бубайрин мисалда лугьузвайвал, гад гьарай я, адан са йикъа хъуьтIуьн са варз тухарда. Сулейман-Стальский райондин хуьруьн майишатдин карханаяр, лежбервилинни фермервилин майишатар ва арендаторарни гатун чуьлдин кIвалахар кьиле тухунин къайгъуйра ава.
— Алай вахтунда карханайрин, арендаторрин вилик акъвазнавай кьилин везифайрикай сад мал-къара патал алафар гьазурун я, — лугьузва райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова. — Векьер ягъунив сифтедай “Зардиян” зонадин хуьрерин майишатар ва арендаторар эгечIна. Алай вахтунда алаф гьазурун саки вири хуьрерин зегьметчийрин къайгъу хьанва. Санлай къачурла, алай йисуз районда 26000 тонндилай тIимил тушиз векъи алаф гьазурда.
Гьамидин Абдулкъафаровахъ галаз чун Вини СтIалрин хуьряй тир тежрибалу арендатор Расим Къафланован багъдиз фена. Кьве кас махсус агрегатралди векьер ягъунал машгъул тир.
— Захъ, стха, 1966-йисуз кутунвай 1,5 гектар ичин багъ ава, — лугьузва Расим Къафланова. — Багъ куьгьнеди ятIани, за анай гьар йисуз ичерин хъсан бегьер вахчузвайди я. Вучиз лагьайтIа, зун адахъ йисан кьиляй-кьилиз гелкъвезва. Идахъ галаз санал, за яваш-яваш кьуьзуь хьанвай тарар атIузва, абурун чкадал цIийи къелемар цан хъийизва. И кIвалахни за сад-кьве йисан къене акьалтIарда.
Расим Къафланова алава хъувурвал, багъларай гьар йисуз булвилелди векьерни кIватI хъийизва. Вичиз бес жедайбур туна, артухан векьер маса гузва. Идани са кьадар къазанжи гъизва.
Чаз акурвал, арендатордин багъдин участок хъсан гьалда ава. Багъларай кIватI хъувур ичер маса гунин патахъайни четинвилер гьалтзавач, абур Кьасумхуьрел ичер кьабулдай базадиз вахкузва. Михьи емишриз гьар йисуз хъсан къиметни жезва.
Ваз къуватар хьурай, гьуьрметлу арендатор Расим Къафланов!
Хазран Кьасумов
