15-июндилай Дагъустанда коронавирусдихъ галаз алакъалу яз тайинарай бязи сергьятар алуднава. Кьилди къачуртIа, республикадин са жерге районринни шегьеррин сергьятрал алай постарин кIвалах акъвазарнава, 400 кв.м. кьадардал къведалди майданар авай карханаяр, жуьреба-жуьре шейэр маса гузвай туьквенар, алишверишдин маканар кардик акат хъувунва, деллекханаяр, гьамамар, салонар, яшайишдинни коммунальный къуллугърин идараяр кIвалахдив эгечI хъувунва.
16-июндиз Дагъустандин Кьил Владимир Васильева Оперативный штабдин нубатдин заседание кьиле тухвана. Ана РД-дин Гьукуматдин Председатель Артем Здунова, РД-дин Кьилин ва Гьукуматдин Администрациядин Руководитель Владимир Иванова, РД-дин халкьдин Собранидин сад лагьай вице-спикер Сайгидагьмед Агьмедова, РД-дин Гьукуматдин председателдин Сад лагьай заместитель Гьажимегьамед Гьуьсейнова, районрин, шегьеррин кьилери, карчийри иштиракна.
Владимир Васильева къейд авурвал, кIвалахдив эгечI хъувунвай вири карханайри Роспотребнадзорди хатасузвал хуьн патал тайинарнавай къайдайрал амал авун чарасуз я. 7-9 югъ арадай фейила гьалариз къимет гуда ва сергьятар алудун давамариз жедани, жедачни веревирдда.
Дагъустандин Роспотребнадзордин Управленидин руководитель Николай Павлова хабар гайивал, санлай къачурла, тIугъвалдин жигьетдай республикада гьалар хъсан патахъ дегиш жезва. Амма бязи чкайра хаталувални амукьзава. Адан гафаралди, Къаякент, Мегьарамдхуьруьн, Дербент районрин, Дербент ва Избербаш шегьеррин мулкарал коронавирусдин цIийи чешмеяр пайда хьунин хаталувал ава. И кар Азербайжандихъ хъфин патал Урусатдин жуьреба-жуьре регионрай хквезвай агьалийрихъ ва датIана пар чIугвадай машинраваз къецепатан уьлквейриз физ-хквезвай инсанрихъ галаз алакъалу я.
Чи мухбир
