Лезги хуьрекар

Баклук гьажибугъдадин гъуьруькай чранвай фу я. Ихьтин фу неинки тlямлу, гьакl гзаф хийирлуни я. Лезги дишегьлийри чразвай фарин жуьреяр гьисабна куьтягь жедач. Мисал яз, инал са бязибу­рун тlварар кьан: шур алай фу, ре­къуьн, тIили фу, гъвар квай фу, базламач, шткар, чар авай фу, черекуьн, къатай фу, ла­ваш, гуьмбе, кIи фу, хьран фу, тIа­нур­дин фу, чIатI, алуга, цикIен, тIунутI, шуьре, акадин фу, гузан, баклук ва масабур.

Къе чна баклук гьикI гьазурдатIа, гьам рикIел хкида.Чаз герек къведа: са кьил чичIек; кьурурнавай як — 200 грамм; гьажибугъдадин гъуьр — 500 грамм; нехуьн гъуьр — 100 грамм; са кака; са кIус гье­рен тум; кьел ва истивут.

ЧичIекдин кьил михьна, куьлуь ийида. Ягълавдиз кьве тIур чIем вегьена, чи­чIек хъсандиз чрана, тагъ ийида. Чрай чичIекдик куьлуь авунвай гьерен тумни кьурай як вегьена, тIимил цIай авуна, мукьвал-мукьвал хуькуьриз, 10-15 де­кьи­кьа­да чрада. Вири чрайла, ягълавдик квай цIай хкудна, рекъидалди тада.

Гьажибугъдадин гъуьрни нехуькай регъвена гьазурнавай гъуьр какадарна, сафунай яна, чранвай якIук вегьеда. Са тупIавай кьел, истивут, са истикан яд ве­гьена, тинидиз тIарамдаказ гъуд гуда.

Бязибуру яд ваъ, къатух кутуна тини ишинда. Тинидин винел са кьадар вахтун­да зегьмет чIугуна кIан жеда: хъсандиз гъуд гуз ишинайла, адакай чрай фу чкIи­дач. Идалайни гъейри, кIарцIин куьмекдалди фан кIалубдиз гъиз регьят жеда.

Пичина цIай къати авуна, тини кIар­цIел яваш-яваш акьалда, чиниз цIакулар яна, сачунал вегьена, чрада. Нуш хьурай квез!

Нарима  Агьмедова