Мегьарамдхуьруьн районда шегьре рехъ ремонт авунин кIвалахар башламишнава. Идакай Инстаграм сетда авай райондин администрациядин кьилин официальный чинал хабар гузва.
“Заз къе эцигунрин кIвалахар кьиле физвай мад са важиблу мензил къейд ийиз кIанзава. Ихтилат государстводин “Дагъустан Республикадин чкадин, муниципалитетрин арада авай ва республикадин дережадин шегьре рекьер туькIуьрун” программадин сергьятра аваз цIийикIа туькIуьр хъийизвай Мегьарамдхуьруьн райондин мулкунилай физвай республикадин важиблувал авай “Ново-Гапцах-Ново-Филя-Тагиркент-Казмаляр-Ялама с подъездом к приграничной станции “Самур” шегьре рекьикай физва”, — къейдзава муниципалитетдин кьил Фарид Агьмедова.
Хабар гузвайвал, рекьин КьепIир-Къазмаяр-Тагьирхуьруьн-Къазмаяр участокда къир цунин кIвалахар гъиле кьунва. И кардал лазим тир техника желбнава.
Рехъ туькIуьрунин кIвалахар пудратдин “Трасса-Д” ООО-ди тамамарзава. Алай вахтунда тайин кьадар кIвалахар кьилиз акъуднава. И карда кьетIен фикир ийизвай кIвалахдин еридиз гузва.
«Лезги газет»
