Исятда вирибур тайин жавабар авачир суалри теспача авунва: зегьримар хьайи коронавирус мус куьтягь жеда? Ахпа вуч жеда? ГьикI жеда? Къе чи республикада коронавирусдихъ галаз алакъалу гьалар, арадал къвезвай нетижаяр эллерин рикIериз са кIусни теселли тагузвайбур я. Санлай уьлкведа гьар сада вич инсанрин гегьенш къатаривай, алакъайривай яргъа, чара авунин шартIар малумарайла, дагъустанвийрин менталитетдивай сад-кьве йикъалай а къайдайриз дурум гуз хъхьанач. Амма тIугъвалдиз кьетIен жуьредин такабурвални терсвал какахьай къилихриз муьтIуьгъ хьун вуч лагьай чIал ятIа чизвач.
Ватцапрай, соцсетрай къвезвай малуматарни, видеороликарни вирусдихъ галаз алакъалубур хьана. За фикир гана: лал кьейи секинвал авачиртIани, кIваляй герек авачиз экъечI тавунин, жува жув чара авунин гьалар малумарай сифтегьан кьвед-пуд юкъуз куьчейра инсанрин, улакьрин гьерекатар адетдиндалай хейлин тIимил хьанвай. Амма гуьгъуьнин йикъара инсанрин, улакьрин гьерекатар са кьадарда гьамишан къайдадиз мукьва хъхьана.
Якъин делилар жемиятдикай чуьнуьхзава лугьуз, и гъвечIи муддатда элдин арада чIуру информация чукIурунал машгъул хьайи тахсиркарарни тIимил хьанач. Вирусди кьил хкажзавай сифте йикъара, Каспийскда яшамиш жезвай са жегьилди инсанар кIвалин дустагъриз вучиз элкъвезвайди я лугьуз, митингдиз кIватI хьунин патахъай шегьерэгьлийрин арада аудиодин малумат чукIурнай. Амма пакадин юкъуз ада вичин эвер гун акьуллувилин амал туширди хиве кьунай.
Садлагьана дегиш хьайи гьава хьиз, инсанрин зендерни сад-кьве гьафте идалай виликанбуруз тамамвилелди акси хъхьана. Сифтедай “коронавирус авай затI туш, абур къалп хабарар я, Дагъустанда садакни акатнавайди туш” лугьузвай. Эхиримжи йикъара “республикада гзафбурук акатнава, азарлубурун, къурбандрин кьадарар тайиндаказ раижзавач, гьакъикъатда рекъемар са шумудра артух я” лугьузва.
Агъзурралди инсанар кIвалахдикай, мажибрикай магьрум хьунилай гъейри, къе мектебра, вузра кIелзавайбурун тарсарни мажбуридаказ онлайн къайдадал элячIуникди иллаки диде-бубайрин патай наразивилер гзаф хьанва. Аквазвайвал, коронавирусди жемиятдиз муаллимрин, духтуррин зегьметдин къадир чирнава.
Афатвилин гьалар къизгъин жезвайла, гьалалзадавалдайбур майданриз экъечIунилай гъейри, жагъин тийизмай хьтин серфе гъиле гьатайбуру хьиз, фирсетдикай хийир къачудай гьарамзадавалдайбурни кими хьанач. Тек са сенжефилдихъ галаз алакъалу “кьисади” квекай лугьузва…
Четин йикъара къанунрал амал авун, пешекаррин, духтуррин фикиррихъ яб акалун, абурун меслятрал амалун важиблу я. Инсаниятдин арада бедбахтвили агъавалзавай макъамда киштанар ягъуникай санлай жемият патал хаталувал ава. И кар ватанэгьлийри са тIимил геж кьатIана.
Пешекарри жуван иммунитет мягькемардай рекьерни фикирдай акъуд тавун теклифзава. Са шакни алачиз, вилик-кьилик квай ксари, духтурри гузвай теклифрикай, меслятрикай, эвер гунрикай хийирдилай гъейри зиян хкатдач. Уьмуьрдиз разивилелди, гележег хъсан хьуник, рикIин мурадар кьилиз акъатуник умуд кутунин саягъда килигун герек я. Ингье квез иммунитет!
Къе дарвилер, четинвилер ацалтзаватIани, абурун гуьгъуьнал генгвални алайди рикIелай ракъур тийин.
К.Ферзалиев
