Азербайжан Республикадин философрин жемиятдиз философиядин илимрин доктор, профессор, Азербайжан Республикадин илимрин лайихлу деятель, рагьметлу Агьмедов Энвер Мирзакъулидин хцин тIвар хъсандиз чида.
Алай йисан 15-майдиз ам дидедиз хьайидалай инихъ 100 йис тамам хьанва. Энвер муаллим Азербайжанда марифатдин (просвещенидин) философия ахтармишай сифте алим я. Ругуд томдикай ибарат тир вири дуьньядин философиядин тарих кхьей авторрикай садни ам я.
Адан тIвар писатель Къурбан Акимова чапдай акъудай “Лезгистан” энциклопедияда хьиз, Азербайжан Республикадин энциклопедиядани гьатнава, ана юкьван мектебра 11-классра кIелзавай аялри “Жемият чирун” тIвар алай предметдай Энвер муаллимдин яратмишунар чирзава. Ам къанни цIуд йисуз Азербайжандин Азизбегован тIварунихъ галай нафтIадинни химиядин институтда философиядин кафедрадин кьиле акъвазна. Адан къелемдикай философиядин месэйлариз талукь 11 ктаб (азербайжан, урус, араб чIаларалди), 132 илимдин кIвалах, Бакуда хьиз, Москвадани “Вопросы философии” журналдин чинриз макъалаяр акъатнава.
Хейлин йисара ам Азербайжан Республикада философиядин кандидатвилин, докторвилин диссертацияр хуьдай илимдин советдин кьилин оппонент яз хьана. Адан гъилик ругуд алимди кандидатвилин ва кьве алимди докторвилин диссертацияр хвена.
Агьмедов Энвер 1920-йисан 15-майдиз Ахцегь райондин Ухулрин хуьре куьчери серкер Мирзакъулидин хизанда дидедиз хьана. Ирид лагьай класс ада Азербайжандин Агъдаш шегьерда акьалтIарна, гуьгъуьнлай педтехникум куьтягьна, Агъдаш райондин хуьрера муаллимвал авуна.
1939-йисуз ам АГУ-дин тарихдин факультетдик экечIна. 1946-йисуз винидихъ тIвар кьур кьилин мектеб яру диплом къачуналди акьалтIарна.
1950-йисуз “Гипотеза и ее роль в философии” темадай кандидатвилин диссертация хвена. 1967-йисуз “Миропонимание Абас-Кули Бакиханова” темадай Москвада докторвилин диссертация хвена. Дагъустандин алимризни кандидатвилин, докторвилин диссертацияр хуьдайла ада вичелай алакьдай куьмекар гана (Агьед Агъаеваз, С.Сардароваз, Гъалиб Садыкъидиз, Мегьамед Абдуллаеваз ва масабуруз).
Энвер муаллимдин чIехи руш Ренади Азербайжандин нафтIадинни химиядин институт акьалтIарна, органикадин химиядай кандидатвилин диссертация хвена, хейлин йисара винидихъ тIвар кьур кьилин мектебда муаллимвиле кIвалахна. Исятда пенсияда аваз Баку шегьерда яшамиш жезва. ГъвечIи руш Лилияди Свердловск (Екатеринбург) шегьердин политехнический университетдин химиядин технологиядин факультет акьалтIарна. Алай вахтунда пенсияда аваз ана яшамиш жезва. Хва Заура дахди кIелай АГУ-дин тарихдин факультет акьалтIарна. 2003-йисуз 36 яшда аваз, дуьшуьшдик акатна, экуь дуьнья дегишна.
Энвер муаллим 1984-йисан 19-майдиз рагьметдиз фена. Ам Мегьарамдхуьруьн райондин Буткъазмайрин сурара фаракъатнава.Адан тIварунихъ Мегьарамдхуьруьн райондин Буткъазмайрин хуьре са куьче янава.
Мукаил Агьмедов,
муаллим, шаир
