Играми ватанэгьлияр! И йикъара чаз халкьарин умуми сувар — 9-Май мукьва жезва. Алай йисуз лагьайтIа, и сувар юбилейдинди я: ЧIехи Гъалибвилин 75 йис тамам хьун къейдзава.
Ватандин ЧIехи дяведа фашистрин винел Гъалибвал къачун Советрин Союз патал четин имтигьанрикай сад хьана. Уьлкведа и дяведин цIай галукь тавур кIвал амукьнач, гьикьван дидеяр рухвайрикай, дишегьлияр итимрикай, сусар чамарикай, балаяр бубайрикай магьрум хьана. Гьикьван агъур хьанатIани, Яру Армиядин аскерри викIегьвал къалурна, чанарни гьайиф татана, кьегьалвилелди Ватан хвена.
Гьайиф хьи, а йисара женгера хьайибурукай къе чи арада лап тIимил ама. Чна, акьалтзавай несилри, абурун баркаллувилер садрани рикIелай алудна кIандач. Гъалибвилик пай кутур гьар са кьегьалдин экуь къамат эбеди яз рикIе хуьн чи умуми буржи я.
Чна квез рикIин сидкьидай Гъалибвилин 75 йис тамам хьун мубаракзава! Къуй дуьньяда ислягьвили, дуствили, муьгьуьббатди агъавалрай!
“ЛЕЗГИ ГАЗЕТДИН”
редакциядин коллектив
