И йикъара чи республикадани Вирироссиядин “Библиойиф -2020” серенжем башламишнава. Дагъустандин культурадин министерстводай “Лезги газетдиз” хабар гайивал, алай йисуз ам “Гъалибвилин 75 гаф” (#75слов Победы) онлайн-марафон яз кьиле тухузва, ана и кар хуш тир вирибуруз иштиракдай мумкинвал ава.
Санлай къачурла, и серенжемда уьлкведин библиотекайра зегьмет чIугвазвай 3 500-далай виниз къуллугъчийри иштиракда. Эфирда абуру военный корреспонденциядай, аскеррин хсуси чарарай цIарар, гьакIни Ватандин ЧIехи дяведин вахтунда фронтда ва далу пата рикI алай ктабрай кьатIар кIелда — ахпани эстафета тамашачийрив вахкуда. И кар кьилиз акъудун патал гьар са ватандашди (винидихъ къейднавайвал, кагъаздай ва я ктабрай) вичи кIелзавай цIарар лентиниз къачун ва рикIиз хуш тир социальный са сетда (@biblioteka05 ва @minkultrd аккаунтар къалурна, #75слов Победы, #библионочь2020 хэштегрик кваз) эцигун лазим я. Виридалайни хъсан кIвалахрин авторриз коронавирусдиз талукь тир сергьятламишунар алудайдалай кьулухъ театрдиз фин патал билетар гуда.
Серенжемдин иштиракчийрин кIвалахар РД-дин культурадин министерстводин, Р.Гьамзатован тIварунихъ галай Милли ктабханадин ва министерстводик акатзавай маса идарайрин сайтра эцигда.
“Чи республикада и серенжем Дагъустандин культурадин министр Зарема Бутаевади ачухна. Ада Эффенди Капиеван фронтдин кхьинрай са чIук кIелна. Эстафета гуьгъуьнлай республикадин культурадин идарайри ва культурадинни искусстводин машгьур деятелри кьуна. Серенжем 25-апрелдилай 9-майдалди давам жеда”, — хабар хгана республикадин культурадин министерстводин пресс-къуллугъдай.
Чи мухбир
