“Лезги газетдиз” Дагъустандин здра­воохраненидин министерстводин пресс-къуллугъди хабар гайивал, и йикъара Махачкъала шегьердин ­клинический больницадиз ва садакай масадак акатдай азаррин центрадиз алай вахтунда вири дуьньядик се­кинсузвал кутунвай коронавирусдихъ галаз женг чIугун яз, чи халкьдин маш­гьур­ хва Сулейман Керимова медицинадин тадаракар (анализаторар, тепловизорар ва икI мад), дарманар ва сагъар хъувунин карда герек къведай хейлин маса затIар маса къачуна агакьарнава.

РикIел хкин: сифтени-сифте сенаторди Дербентдив куьмек агакьарун патал пар ялдай са шумуд машинда аваз медикаментар ва лазим тадаракар аниз рекье тунай. Санлай къачурла­, и тIугъвал­дихъ галаз женг чIугун па­­тал­ С.Керимова 1,5 миллиард манатдилай виниз пулдин такьатар чара авунва­.

Къени крарик агьвал авай маса ксарини чпин пай кутазва. ИкI, “Лекарь старый” клиникадин учредитель, меценат Мегьамед Ибрагьимовани Махачкъала шегьердин клинический больницадиз искусственный къайдада жигеррин кIва­лах къайдадик кутазвай (ИВЛ)  цIийи 4 аппарат багъишна.  Мергьяматлувилин и серенжемда Махачкъаладин Советский райондин администрациядин векилрини иштиракна.

— Четин вахтунда куьмек гун абурлу кIвалах я. Гьаниз килигна, чна цIийи 4 аппарат маса къачун патал такьатар жагъурна. Инанмиш я, абуру сагъламвал хуьнин карда екез куьмекда, — лугьузва М.Ибрагьимова.

Дагъустандин здравоохраненидин министр Жамалудин Гьажиибрагьимова алай четин вахтунда куьмекдин гъил яргъи ийизвай, жуван ватандашрин сагъламвилин къаравулда акъвазнавай гьар са касдиз сагърай лугьузва.

— ИкI, меркездин клинический больницада искусственный къайдада жигеррин кIвалах къайдадик кутадай 40 аппарат авай, гила мад 4-дан  артух­ хъхьанва. Ида мадни гзаф ксарин уьмуьр хуьз, сагъламвал гуьнгуьна ху­таз куьмекда. Къенин четин аямда, неинки чи республикада, гьакI­ни вири уьлкведа, дуьньяда­ эпидемиологиядин чIуру гьалар арадал атанвайла, здравоохраненидиз куьмек гун важиблу кар я. Хъсан крарик кьил кутун, кIе­ве авайдаз куьмек гун дагъвийри вири де­вирра баркалла къведай кар яз гьисабайди я, умудлу я, къенлай кьу­лухъ­ни гьакI амукьда,  — лугьузва  министрди.

Рагнеда Рамалданова