21-апрелдиз Дагъустандин Гьукуматдин Председатель Артем Здунова коронавирусдин вилик пад кьунихъ галаз алакъалу яз республикада арадал гъанвай штабдин нубатдин заседание кьиле тухвана. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.

Мярекатда министерствойринни ведомствойрин регьберри иштиракна.  РД-дин Роспотребнадзордин кьил Николай Павлова къейд авурвал, идарадиз арадал атанвай шартIара кIвалахдай ихтиярар къачун патал 4545 карханадин патай арзаяр атанва. Лагьана кIанда, кIвалах­дай ихтиярар анжах Роспотребнадзорди тайинарнавай къайдайрал амал ийизвай карханайриз гузва. А къайдайрикай ге­гьенш малуматар “Зи Дагъустан” порталда чапнава. Николай Павлован гафаралди, бязи карханаяр тайинарнавай къайдаяр кьилиз акъудиз гьазур туш, гьавиляй абуруз кIва­лахдай ихтиярарни ганвач.

Артем Здунова карханайрин регьберрин, карчийрин арада мад сеферда гъавурда тунин кIвалах тухунин буйругъ гана.

РД-дин Кьил В.Васильеван тапшуругъдалди, алай вахтунда Дагъустанда карантиндин серенжемар генани кIе­ви авунва. Ин­санар чпин улакьра аваз санай масаниз фи­нал тайин тир сергьятар эцигнава. И месэла­­­дикай вичин рахунра РД-дин къенепатан крарин министрдин за­меститель, полиция­дин­ начальник Дмитрий Гутыряди ихтилатна.

— Кьабулзавай серенжемрикай республикадин агьалийриз виликамаз хабар ган­вайтIани, гзафбуру карантиндин къайдайрал амалзавач, — къейдна полициядин начальникди. — Гьа са вахтунда тайинарна­вай къайдаяр чпиз талукь тушир идараярни­ ава. Абурук коммунальный, недай-хъвадай суьрсетдалди таъминардай, меди­ци­на­­­дин, пассажирар санай масаниз тухудай улакьрин ва маса къуллугъар акатзава. Эгер и ме­сэладин жигьетдай гьуьжет алай дуьшуьшар хьайитIа, РД-дин МВД-дин телефондин 98-40-03 нумрадиз зенг ийиз жеда.

Артем Здунова Роспотребнадзорди кIва­лах­дай ихтиярар ганвай карханайрин ва Да­гъустандин Кьилин къарардин би­не­даллаз кIвалахзавай идарайрин векилар санай масаниз финин месэладиз кье­тIен фикир гун буйругъна.

РД-дин экономикадин ва мулкар вилик тухудай министерстводин кьил Гьажи Сул­танова республикадин Кьилин къарардин бинедаллаз къенин юкъуз тахминан 6 агъзур карханади кIвалахзавайди къейдна. Анра зегьмет чIугвазвай къуллугъчийрин кьадар 27 агъзурдав агакьзава­.

Заседанидин сергьятра аваз бейкарвилин вилик пад кьуниз ва бейкарриз куьмек гуниз, эцигунрин хилез талукь месэлаярни веревирдна. Абурукай гегьеншдиз РД-дин Гьукуматдин сайтдай кIелиз жеда.

«Лезги газет»