Коронавирусдихъ галаз алакъалу гьалар Дагъустанда къвердавай къизгъин жезва. РД-дин Роспотребнадзордин делилралди, 22-апрелдиз Дагъустанда коронавирус акатнавайбурун кьадар 417-дав агакьнава. Гьа са вахтунда духтуррилай начагъ хьанвай 43 кас сагъар хъийиз алакьнава. Санлай къачурла, республикада 12033 кас ахтармишнава. 1955 кас лагьайтIа, карантиндал ала. Абурукай 29 кас яшар 65 йисарилай алатнавайбур я. Коронавирусди республикада 11 кас кьенва.
Къейд ийин, коронавирусдин вилик пад кьун патал Дагъустанда кьетIен гьалар кардик кутунва. Республикадин руководстводи агьалийриз игьтияж авачиз кIвалерай экъечI тавуниз эвер гузва. И кар яшара авайбур патал иллаки важиблу я. ГьикI лагьайтIа, тежрибади къалурзавайвал, яшара авай инсанрин организмдиз тIугъвалдиз дурум гуз четин жезва.
Гьайиф хьи, тайинарнавай къайдайрал вирида амал ийизвач. “Дагъустан” РИА-дин делилралди, къайдайрал амал тийизвай агьалияр виридалайни гзаф Буйнакск, Махачкъала, Дербент шегьерра ава.
Играми ватанэгьлияр! Чавай гьар садавай коронавирусдин вилик пад кьуник жуван пай кутаз жеда. Герекди тайинарнавай къайдайрал амал авун я. РикIел хуьх, и кардилай чи сагъламвал аслу я.
«Лезги газет»
