Мегьарамдхуьруьн районда таможнядин “Ярагъ-Къазмаяр” пунктунай Азербайжандин агьалийриз чпин ватандиз хъфидай мумкинвал гана. Идакай ТАСС-ди хабар гузва.
Чешмедин малуматралди, часпардилай элячIайбурун кьадар 500 касдилай алатнавай.
Мегьарамдхуьруьн райондин администрациядин пресс-къуллугъди хабар гузвайвал, къунши уьлкведин агьалияр чпин ватандиз рахкурун патал Урусатдинни Азербайжанди икьрардин бинедаллаз махсус дегьлиз арадал гъана. Коронавирусдихъ галаз алакъалу яз кьабулай серенжемар себеб яз абурувай вахтунда Азербайжандиз хъфиз хьанач. Абурун чIехи пай Урусатдин жуьреба-жуьре регионра яшамиш жезвайбур я.
РикIел хкин, Мегьарамдхуьруьн райондин руководстводи часпардилай элячI тежезвайбур ксудай чкайралди, недай-хъвадай суьрсетдалди таъминарнавай. Абуру чпин гьакъиндай къайгъударвал малумарунай муниципалитетдин кьилевайбурулай разивал къалурна.
Къейд ийин хьи, алай вахтунда Урусатдинни Азербайжандин часпар михьиз агалнава.
«Лезги газет»
