Гьуьрметлу Владимир Владимирович!
Сифте нубатда Квехъ мягькем сагъвал, агалкьунар, ЧIехи Гъалибвилин сувар кьиле тухунин, милли проектар кьилиз акъудунин карда лайихлувилер хьана кIанзава. Россия къецепатан ва къенепатан душманрикай хуьнай халкьди Квез баркалла лугьузва. Куьне уьлкведин къудратлувал чкадал хкана ва вири дуьньяда и гьакъикъат кьабулнава.
Федеральный Собранидиз Куь Чар халкьдин агьваллувал хкажун патал тухузвай сиясат давамарун я. Къуй Аллагьдини Квез и карда куьмек гурай! Инсанар кесибвиляй акъудайла халкьдин руьгьни, военный къуват хьиз, мягькем жеда.
2020-йисан 9-майдиз чна ЧIехи сувар — Ватандин ЧIехи дяведа гъалиб хьунин 75 йисан юбилей къейдда. Сифте нубатда им Советрин халкьдин, дяведин иштиракчийрин, ветеранрин сувар я. Гъалибвилин Кьилин Гъалибчи галачир ам гьихьтин сувар жеда? Вучиз за и цIарар кхьизва? Мукьвара за телевизордай ветеранрин рахунрихъ яб акална. Абурухъ, алай несилризни чир жедайвал, чи тарихдин регьберар тир В.И.Ленин ва И.В.Сталин лайихлу чкадал хкидайдан, игитвилин тарихдин гьакъикъат винел ахкъуддайдан, Гъалибвилин, ватанпересвилин лишан тир Сталинан памятникар эхциг хъийидайдан гьакъиндай умудар ава.
Сталин Советрин халкьдин дамах я. Дуьньядин сиясатдин тарихда ахьтин кьетIен бажарагъдин, алакьунрин кас — Генералиссимус хьанвайди туш. Несилрин рикIера ам Кьилин Гъалибчи ва вири аскеррин Главнокомандующий яз амукьда. Аскерар гьужумдиз “Ватан патал, Сталин патал!” лугьуз физвай. Маса государствойрин гьи армийра, гьи касдин тIвар мецел алаз аскерар гьужумдиз фена? Авач ахьтинбур.
ХХ асирда государстводиз камаллувилелди регьбервал гайи и инсанрин, игитрин тIварар тарихда хтуни, Гъалибвал къазанмишунин карда еке роль къугъвай шегьеррал Ленинград ва Сталинград тIварар эхцигуни общество пайгарвилик кухтуниз, гьахълувал вине кьуниз, Ватандал рикI алай цIийи несилар тербияламишуниз къуллугъда.
Эгер и хъсан крар кьилиз акъудайтIа, абур ЧIехи Гъалибвилин 75 йисан юбилей къейдзавай сувариз чи вири халкьдиз, дяведин иштиракчийриз, ветеранриз лап хъсан савкьат жедай. Къвезмай несилар патални тарихдин гьахълу кар жедай. Ида халкьдин руьгь, ватанпересвилин гьисс хкаждай, Россиядин нуфуз мадни виниз акъуддай. Вири инсаниятдини и гьахълу кар дуьньяда ислягьвал мягькемарунин гьар са месэла пайгардик кутунин, азадвилин, аслу туширвилин ерияр хуьнин лишан хьиз кьабулдай. РагъакIидай патан ва чи уьлкведа авай тапан тарихчийрин сиверни агал жедай.
Гьуьрметдивди,
Россиядин ватанперес С.Ш.Надеждин
