Сулейман-Стальский районда мергьяматлувилин серенжемар мукьвал-мукьвал кьиле физва. Коронави­русдин тIегъуьн чукIунихъ галаз алакъалу яз, инсанри­ чпи-чеб жемиятдикай чара авунин гьалар малумарнавай шартIара игьтияж авайбуруз куьмек гун, мергья­­матлувилин крар кьилиз акъудун иллаки важиблу я.

Къенин муракаб муддатда эменни тIимил авайбуруз куьмек гунин мураддалди, общественный деятель, гьамиша регьимлу крар кьилиз акъудзавай ватанэгьлийрикай тир Имам Яралиеван патай райондин 100 хизандиз недай-хъвадай суьрсетар гана.

Сулейман-Стальский райондин администрациядин пресс-къуллугъди хабар гузвайвал, игьтияж авайбурун сиягь райондин КЦСОН-ди (Комплексный центр социального обслуживания населения) ва хуьрерин администрацийри тайинарна.

Мергьяматлувилин серенжем духтуррин текли­фар­ фикирда кьуна, махсус маскаяр, бегьлеяр алукI­на, антисептикрикай менфят къачуна, кьилиз акъудна.­

Коронавирус чукIунин къурхулувал авай макъамда хъсан кардик кьил кутунай Имам Яралиеваз райондин руководстводи чухсагъул малумарна.

КIевяй акъудна

И четин йикъара Мегьарамдхуьруьн райондин кьил Фарид Агьмедовани баркалла гъидай кар кьилиз акъудна. Райондин пресс-къуллугъди малумарайвал, Россиядай Азербайжандиз хъфиз кIанзавай хейлин ватандашриз “Ярагъ-Къазмаяр” сергьятдин пунктуна эхиримжи йикъара коронавирус чукIуникди арадал атанвай гьаларикай хабар авачир. Сергьятдилай элячIун патал махсус документ гуьзетун патал абур са шумуд юкъуз акъвазуниз мажбур хьана.

Азербайжандин ватандашар кIеве гьатай макъамда Мегьарамдхуьруьн райондин кьилин тапшуругъдалди абуруз мугьманханада ва мис­кIинда яшамиш жедай мумкинвал гана. Идалайни гъейри, гьар юкъуз абуруз вахт-вахтунда недай-хъвадай суьрсетарни тухвана. Сергьятдилай элячIна чпин ватандиз хъфиз кIанзавайбурун кьадар саки агъзурдав агакьнавай. Азербайжандин МИД-ди ихтияр гудалди, абур пуд юкъуз вил алаз акъвазна.

«Лезги газет»