Санлай къачурла, Урусатда шекердин къимет хкаж хьанвач. РД-дин хуьруьн майишатдин ва недай-хъвадай суьрсетдин министерстводин пресс-къуллугъди хабар гузвайвал, 2016-йисалай инихъ уьлкведа шекер халкьди ишлемишзавайдалай гзаф гьасилзава. И кардихъ галаз алакъалу яз, и метягь базарра булдалди авайбурукай сад яз гьисабзава.

2019-йисуз уьлкведа шекердин чугъундурдин бул бегьер кIватI хъувуна. И карди къенепатан базарда шекердин къимет 43 процентдин агъуз аватуниз таъсирна.

Дагъустандин базарра авай гьаларикай рахайтIа, бязи метягьрин къиметар тIи­мил хкаж хьун — им гьар йисуз кьиле физ­вай адетдин кар я. РД-дин хуьруьн майишатдин ва недай-хъвадай суьрсетдин министерстводин делилралди, и вахтунда (гатфарихъай) маса регионрай гъизвай, маса хгуз къачузвай метягьрин къиметар хкаж жезва. Абурун арада жуьреба-жуьре майваярни ава. Майдин вацран эвел кьилера къиметар авайдалай агъуз хъжеда. Идалай гъейри, республикада келемдин ва теплицайра гьасилзавай са жерге майвайрин къиметар агъуз ават­нава.

Мартдин, апрелдин варцара Дагъустандин базарра шекердин къимет 33 манатдилай 40 манатдал кьван хкаж хьун вилик квай варцара адан къимет лап агъуз аватунихъ галаз ала­къалу я. Гекъигайла малум жезвайвал, исятда авай къиметар 2015-2016-йисарин къимет­рилай агъузбур я. Да­гъустанда шекер гьасилзавач, гьавиляй адан къиметни и метягь республикадиз агакьарзавайбурун къиметдилай аслу жезва.

Къейд ийин хьи, Махачкъаладин бязи туьквенра недай-хъвадай суьрсетдин къимет базардин къиметдилай агъуз я: гъуьруьн, гречкадин, дуьгуьдин, шекердин ва мсб. Туьквенрин сагьибри тайин тир суьрсет гьасилзавайбурухъ галаз икьрарар кутIунзава ва арада арачи авачирвиляй къиметарни агъуз­бур жезва.

Агьмед  Магьмудов