Дагъустанда алай йисан гатфарихъай 200 гектардин майданра ципицIлухар кутадайвал я. Идакай РД-дин хуьруьн майишатдин ва недай-хъвадай суьрсетдин министерстводин пресс-къуллугъди хабар гузва.

ЦипицIлухрин цIийи  майданар Къарабудахкент, Къаякент, Бабаюрт ва Дербент районра пайда жеда. Къейд ийин хьи, абур кутуниз, абурухъ гелкъуьниз акъатзавай харжийрин са пай государстводи вичин хивез къачузва.

Санлай къачурла, 2020-йисуз республикада ципицIлухар 1400 гектардин майданра кутун фикирдиз къачунва. Алатай йисав гекъигайтIа, цIи 500 гектардин артух жезва. РикIел хкин, алатай йисуз Дагъларин уьлкведа эхиримжи 30 йисан къене сифте яз 193,2 агъзур тонндив агакьна ципицIрин бегьер кIватI хъувунай.

«Лезги газет»