“Лезги газетдиз” РД-дин здравоохраненидин министерстводин пресс-къуллугъди хабар гайивал, мукьвара республикадин онкологиядин центрадин бинедал маммологиядин отделение ахъайна. 40 койка авай идара азарлуяр кьабулиз гьазур я.

Къейд ийин хьи, ина некIедин железадик макь (рак) азар квай дишегьлияр сагъар хъийизва. Отделенида алай аямдин медицинадин техникадалди таъминарнавай операцияр тухудай кьве блок кардик ква. ЦIийи тадаракри духтурриз муракаб операцияр кьиле тухудай мумкинвал гуда.

РД-дин здравоохраненидин министр Жамалудин Гьажиибрагьимован гафаралди, дишегьлийрин некIедин железадик рак азар акатзавай дуьшуьшар виликамаз тайинарун отделенидин кьилин везифайрикай сад я. Онкологиядин центрадиз къвезвай гьар са азарлуди чпихъ хейлин йисарин тежриба авай пешекар духтурри тамамдиз ахтармишда ва дуьз диагноз эцигда.

Центрадин кьилин духтур Владимир Брежнева къейд авурвал, ина гьакIни мультиспиральный компьютердин томограф (МКТ), рентгендин, эндоскопиядин кабинетар, цитологиядин ва биохимиядин лабораторияр кардик ква.

Лагьана кIанда, коронавирусдихъ галаз алакъалу гьалари центрадин кIвалахдиз таъсирнавач. Азарханади виликдай хьиз кIвалахзава.

Чи мухбир