Алай вахтунда Дагъустандин здравоохраненидин министерство жигеррин азарди тади гузвай ксар патал искусственный вентиляциядин 58 аппарат (ИВЛ) къачунин къайгъуйрик ква. Абурукай региондиз 8 агакьнава. Накь абур республикадин садакай масадак акатдай азаррин центрадиз рекье туна. Идакай РД-дин здравоохраненидин министр Жамалудин Гьажиибрагьимова хабар гана. Амайбурни мукьвара агакьун гуьзетзава. Къенин юкъуз республикадин медицинадин идарайра ИВЛ-дин 688 аппарат ава.

Идалай гъейри, министерстводин руководстводи кислороддин 50 концентрат маса къачунин патахъайни къайгъу чIугвазва. ГьикI хьи, коронавирус акатнавайла, кислороддалди (оксигенотерапия) сагъарунин къайдадикайни гегьеншдиз менфят къачузва.

Мадни азар акатнавай ксар санай масаниз тухудай изоляторар, дезинфекционный мобильный камераяр ва маса тадаракар маса къачудайвал я.

Къейд ийин хьи, РФ-дин Гьукуматди уьлкведин регионар патал 5 агъзурдалай виниз ИВЛ-дин аппаратар маса къачун патал резервдин фондунай пул чара авунва. Дагъустан патал ИВЛ-дин 171 ва ЭКМО-дин 2 аппарат  маса къачудайвал я. Абурни кваз мукьвара чи региондиз 229 аппарат агакьдайвал я.

“Республикадин здравоохраненидин министерство коронавирусдихъ галаз алакъалу яз арадал атанвай эпидемиологиядин гьалара кIвалахуниз гьазур жезва. Къенин юкъуз медицинадин идарайра аппаратрин кьитвал авач. Эгер республикада карантиндал амал тавуртIа, инсанри кIвалера ацукьунин эвер гун кваз такьуртIа ва идахъ галаз алакъалу яз чIуру гьалар арадал атайтIа, мумкин я, авай тадаракарни бес тахьун. Мумкинвал авай гьар са кас кIвале амукьун лап важиблу я. Ихьтин серенжемри куьн ва  куь багърияр чIуру азардикай хуьз кьумекда. КIвале акъудзавай вахтуникай менфят хкудиз алахъ”, — лугьузва РД-дин здравоохраненидин министр Ж.Гьажиибрагьимова.

«Лезги газет»