Дагъустандин патай сенатор, карчи Сулейман Керимова Ватандин ЧIехи дяведин Дагъустандин вири ветеранриз ва Ленинграддин гьалкъада хьайибуруз 1 миллион манат савкьат яз гуда.
Мукьвара малум хьайивал, С.Керимова Гъалибвилин 75 йисан юбилейдихъ галаз алакъалу яз Дербент шегьердин ветеранриз гьар садаз 1 миллион манат гун кьетIна. Шегьерда алай вахтунда ахьтин 5 ветеран яшамиш жезва.
СМИ-дин такьатра и хабар чкIайдалай кьулухъ, Дагъустандин агьалийри сенатордивай ихьтин пишкеш чи республикада яшамиш жезвай гьар са ветерандиз ва гьалкъада хьайи Ленинград хвейибуруз гун тIалабна. Дагъустанда Ватандин ЧIехи дяведин 82 ветеран ва 9 «блокадник» яшамиш жезва.
Сулейман Керимова агьалийрин тIалабун хушвилелди кьабулна ва лап четин вахтара Ватан хвейи кьегьалриз гьар жуьредин куьмекар гуз гьазур тирди малумарна.
«Лезги газет»
