Са тIимил вахтар идалай вилик вичин ери-бине Сулейман-Стальский райондай тир Эдик Агьмедова 16 кг-дин кьве гиря (хуралай рум гана) 2020 сеферда хкажна. Им неинки Россияда, мумкин я, вири дуьньядани рекорд яз хьун. Агьмедов гиряйрин рекьяй спортдин мастервиле кандидат я.
ЦIийи рекорд эцигзавай чи ватандашди акъажунар Дербентда, Нарын-къеледа, гзаф инсанар, гьакI республикадилай къецяйни атанвай мугьманар-туристар шагьидар яз, хкажна. Идаз талукь видео ава. Спортдин и жуьредал рикI алай ва ватандашдин агалкьунрал шадвалзавай ксаривай адаз интернетдай тамашиз жеда. ИкI, тамам 3 сятда Э.Агьмедова 2020 сеферда, ял ягъ тавуна, гиряяр хкажна. Идалайни гъейри, и юкъуз спортдин и жуьредал машгъул жезвай жегьилрини (гиревики-жонглеры) чпин устадвал къалурна: гиряяр хкажиз, абурув, тупунив хьиз, къугъвана. Дугъриданни, жегьилри кIватI хьанвайбур вири гьейранарна, гьакьван устаддаказ абуру чпин алакьунар къалурна.
Малум хьайивал, Эдик Агьмедова ва амай жегьилрини тренер Саидов Магелан Саидовичан гъилик вердишвилер къачузва. Ам Дагъустандин гиряйрин рекьяй федерациядин президент, Россиядин спортдин мастер я. Адан гъи-ликай гзаф кьадар чемпионар, гьам Европадин ва гьамни дуьньядин рекордар эцигнавай ксар хкатна.
Сир туш, эхиримжи вахтара гиряйрин спорт неинки Россияда, гьакI вири дуьньядани къвердавай машгьур жезва. Гиряяр хкажунай чпин къуватарни устадвал спортдин саки вири жуьрейрал машгъул жезвай спортсменри къалурзава ва ахтармишзава. Спортдин и жуьреди неинки беден, гьакIни руьгь лигимарзава.
Эдик Агьмедовахъ галаз кьиле фейи куьруь суьгьбетдай малум хьайивал, ам эцигнавай рекорддал акъваздайвал туш. Адаз, Гиннессан рекордрин ктабда гьатун патал арза (заявка) гуналди, 16 кг-дин заланвал авай кьве гиря (хуралай рум гуналди) 3000 сеферда хкаждай къаст ава.
Чна Эдик Агьмедов вилик эцигнавай мураддив агакьун ва кьиле чи ватандаш, кьасумхуьруьнви кьегьал хва Магелан Саидов акъвазнавай республикадин гиряйрин рекьяй спортдин федерациядихъ хъсан нетижаяр, дамахдай крар гзаф хьун алхишзава.
Эхирдайни чна газетдин чинал Магелан Саидован тIалабун гузва: республикадин гьар са хуьре, районда, шегьерда гиряйрин спортдал гзаф ксар желбун ва и жуьре машгьурунин мураддалди, гьакIни акъажунарни турнирар, кIвенкIвечивилерни чемпионатар кьиле тухун патал Дагъустандин федерациядиз спонсоррин куьмек герекзава. Гьаниз килигна, мумкинвал авай ксаривай Магелан Саидован телефондин 8-928-218-79-33 нумрадиз зенг ийиз ва smogelan@mail.ru электронный адресдиз кхьена, хабар гуз жеда.
Ибрагьим Демиров,
ДГУ-дин филфакдин ОЖ-дин студент
