И йикъара РД-дин здравоохраненидин министр Жамалудин Гьажиибрагьимованни Дербентдин кьил Хизри Абакарован ва шегьердин ЦГБ-дин регьбер Абдулкъафар Шихмегьамедован иштираквал аваз кьиле фейи гуьруьшдал къадим шегьерда алай аямдин лап виниз тир дережадин азархана эцигунин месэлаяр веревирдна.
Дербентдин мэрди важиблу объект эцигун патал чилин участок чара авунва. Сифтегьан паюна меценатри куьмекар гуда, гуьгъуьнлай федеральный центради амай крар кьилиз акъудиз куьмекда. Им агьалийрив гзаф терефрихъай ва 3 дережада аваз медицинадин куьмекар агакьдай азархана жеда. Авай къурулушрал, адетдин жуьрединбурал медицинадин центрада кIвачел залан ва чпихъ жуьреба-жуьре патологияр авай дишегьлийрин, реабилитациядин отделениярни алава хъжеда, гьакIни ина паллиативный куьмек гунни пландик кутунва. ЦIийи центрадихъ садакай масадак акатдай азаррин, хамунинни венерологиядин ва патологоанатомиядин корпусарни, гьакI “тади куьмекдин” автопаркни жеда. Ина гьа са вахтунда неинки са чIехибуруз, гьакI аялризни, неинки са Дербентдай, гьакI Кьиблепатан Дагъустандай тир ксаризни куьмекар гуда.
— Дербентда ихьтин зурба, алай аямдин лап виниз тир дережадин сагъламвилин идара эцигуни агьалийриз медицинадин рекьяй хъсан еридин куьмек къачун регьятарда. Чи везифа гележегда объект эцигунрин кIвалахда “штатдинбур тушир” гьалар арадал татун патал и месэла гьар патахъай, гьа гьисабдай яз региондин кьетIенвилер ва мумкин тир четинвилер (риск) фикирда кьуналдини ахтармишна чирун я, — къейдна министр Ж.Гьажиибрагьимова.
Вичин нубатдай яз, Хизри Абакарова цIийи азархана эцигун шегьердин ва санлай вири республикадин агьалияр патал лап важиблу тирди къейдна.
“Медицинадин и объект эцигун шегьер патал акьалтIай зурба кар я!” — алава хъувуна ада.
«Лезги газет»
