Алатай гьафтеда “Дагъустандин дишегьли” журналдин 1-нумра чапдай акъатна. Алай йисан сифте нумра тир адан жилдинал къастунал кIеви, шииратдал кьару, зериф, гуьрчег дишегьли Саидова Раида Ревшановнадин шикил ала.
Вичин ери-бине Ахцегьай тир, алай вахтунда Астраханда яшамиш жезвай Раида Ревшановнади хайи чIал машгьурунин макьсаддалди са шумуд йисуз “Чна бажарагъар жагъурзава” лишандик кваз урус чIалай лезги чIалаз шиирар таржума авунин конкурс кьиле тухвана. Ада хайи чIалан, эдебиятдин, медениятдин тIал алай месэлайрикай кхьизвай макъалаяр кIелзавайбуру хушдиз кьабулзава.
Театр тамашачийриз шадвални эркинвал гузвай, лезги чIал хуьзвай ва раижзавай макан я. “Амалиядин агалкьунар” макъалада кIелзавайбур СтIал Сулейманан тIварунихъ галай лезги муздрамтеатрдин жегьил актриса Амалия Керимовадихъ галаз танишарзава.
Гьелбетда, чи гележег тир, аялар патал журналда махар, ребусар, жуьреба-жуьре итижлу шикилар ганва.
Гуьлнара Асадулаевади гьазурзавай “Зи Дагъустан” рубрикадик кваз гьар сеферда Дагъустандин ивиррикай, медениятдин имаратрикай, гуьрчег акунри туристар желбзавай чкайрикай малуматар гузва. Журналдин сад лагьай нумрада Куьгьне Къагьиб хуьруькай куьрелди малуматар ганва.
Гъалибвилин 75 йисаз талукь яз алай йисуз журналда дишегьлийрин викIегьвилерикай, кьегьалвилерикай макъалаяр чапзава. “Дяве — им ивидин ни я” макъалада Зегьметдин Яру Пайдахдин ордендин, “Кавказ оборона авунай”, “Баркаллу зегьметдай” медалрин сагьиб Аминат Ибрагьимовадикай ихтилатзава.
“Четин месэла” рубрикадик кваз Виолетта Ратенковадин “Рапунин кIвенкIвел алай кьисмет ва я “чан алай” мейитар” макъала ганва. И макъала кIелайла, наркотикар ишлемишиз кIан хьун фикирдизни къвен тийидайдахъ вири инанмиш жеда.
Мадни журналда итижлу макъалаяр, хийирлу меслятар, хуьрекар гьазурдай рецептар ганва. Буюр, кIела!
Журнал почтадин отделенийрай подписка тавунвайбурувай ам Дагпечатдин киоскрай маса къачуз жеда.
Чи мухбир
