Алай йисан 2 ва 3-декабрдиз Каспийскда, Алфёрован куьчеда авай “Энергия” ДЮСШ-дин спортзалда, ушу-саньдадай, Россиядин лайихлу мастер — вичин ери-бине Ахцегь райондин Гутумрин хуьряй тир Юнус Гьуьсейнован экуь къаматдиз бахшна, IV международный турнир кьиле тухуда.
Ана Дагъустандин шегьеррайни районрай ва гьакIни Кеферпатан Кавказдин амай республикайрай, мукьвал тир къецепатан уьлквейрай, гьа гьисабдай яз Эрменистандай, Азербайжандай, Къазахстандай 100-далай виниз спортсменри иштиракун гуьзлемишзава. Вири санлай заланвилин 8 категориядай спортсменри чпин устадвал къалурда.
Турнирдин тешкилатчийри къейдзавайвал, иштиракчийрин арада дуьньядин ва Европадин чемпионарни жеда. Алатай йисара хьиз, цIини турнирдин кьилин пишкеш яз автомашин гун тайинарнава. Ам лагьайтIа, адетдиз элкъвенвайвал, Юнус Гьуьсейнова вичин устадвал къалурай заланвилин пуд категориядикай (60, 70, 75 кг) садай ва гьакIни 65 кг-дин заланвиляй гудайвал я. Заланвилин амай категорийра чпин алакьунар къалурай спортсменризни къиметлу пишкешар гун тешкилатчийрин пландик ква.
РикIел хкин: Юнус Гьуьсейнов ушу-саньдадай ва кунг-фудай дуьньядин чемпион тир. Ада Махачкъалада “Аманат” клубда вичин устадвал хкажзавай, Россиядин Дагъустанда авай ФСБ-дин Управленида кIвалахзавай. 2012-йисуз машгьур спортсмендал яракьлу гьужумна, нетижада ам телеф хьана.
«Лезги Газет»
