Алатай гьафтеда Дагъустандин халкьдин майишатдин университетда РД-дин информатизациядин, алакъадин ва массовый коммуникацийрин министерстводи тешкилнавай терроризмдин идеологри информациядин такьатрин куьмекдалди тухузвай чIуру кIвалахдиз акси серенжемар тешкилунин жигьетдай вердишвилер гунин ва методикадин рекьяй мярекат кьиле фена. Адан кIвалахда геополитический экспертизаяр ийидай центрадин директор Валерий Коровина, Дагъустан Республикадин ва шегьерринни районрин терроризмдиз акси комиссийрин векилри, РД-дин информатизациядин, алакъадин ва массовый коммуникацийрин министерстводин къуллугъчийри, журналистри иштиракна.

КIватI хьанвайбур кьве секциядиз пайна. АТК-дин векилрин ва журналистрин вилик чкайрал терроризмдин идеологиядин аксина ту­хузвай кIвалахдин, кьабулзавай серенжемрин гьакъиндай менфятлу докладар авуна. Терроризмдиз информациядин рекьяй акси акъвазунин секцияда (модератор — РД-дин Минкомсвяздин информациядинни культурадин координационный центрадин руководителдин заместитель Амиля Аскерова) общественный хатасузвилин месэлайрай Дербент шегьердин администрациядин кьилин заместитель Шамил Алиева вичин доклад “Алай вахтунин шартIара терроризмдихъ галаз женг чIугунин карда информациядин такьатрин важиблувал” темадиз бахшна.

Ада къейд авурвал, терроризм­дин идеологри алай вахтунда соци­альный сетрикай гзаф менфят къачузва. ГьикI лагьайтIа, чи уьлкведа къадагъа авунвай экстремизмдин ор­ганизацийрихъ галаз кьетIи­ви­лелди женг чIугвазва. Яд уьл­квейра­ ацукьна, абуру интернетдин куьмекдалди жаван ва жегьил кьилер алдатмишзава, абуруз иер, асайиш уьмуьр теклифзава, гьа­къи­къи диндин лайихлувилер чIуру патахъай ачухарза­ва. ИкI тахьун патал сифте нубатда кIва­лера, ах­па школайра, сузра, вузра чи рух­ва­яр ва рушар тер­роризм­дин тIе­гъуьн чукIур­завай идеологрин таъсирдик акат тавун патал герек тир вири серенжемар кьабулна кIанда.

Кьвед лагьай секцияда (модератор — Дагъустандин образование вилик тухудай институтдин кафедрадин заведующий, тарихдин илимрин кандидат Казбек Пашаев) общественный хатасузвилин месэлайрай Къумторкъала райондин администрациядин кьилин заместитель Марат Жанбалова “Экстремизмдиз ва терроризмдиз акси кIва­лахда интернетдикай менфят къачунин кьетIен­вилер” докладда телефондин трубкайрин, смартфонрин, айфонрин, планшетрин иесияр­ хьанвай аялар диде-бубайрин, муаллимрин гуьзчивиликай хкатзавайдакай, интернетдай агакьзавай кьван чIуру информацияди абурун кьил-кьилелай алудзавайдакай ва и гьаларихъ галаз кьетIи­вилелди женг чIугуна кIан­завай­дакай лагьана.

Мярекатдин нетижаяр кьадайла, РД-дин информатизациядин, алакъадин ва массовый коммуникацийрин министр Сергей Снегирева ва Валерий Коровина терроризмдиз, экстремизмдиз талукь яз информациядин массовый такьатриз ва интернетдиз акъатзавай идеяйриз акси кIвалах тухун гьикьван важиблу ятIа лагьана.

Хийир  Эмиров