15-февралдиз Белиждин 2-нумрадин юкьван школада, и поселокдин администрациядин кьилин къуллугъдал кlвалахай Юсуф Азизович Азизов рикlел хкуниз талукьарна, Дербент райондин кьиблепатан зонадин школайрин командайрин арада волейболдай ачух турнир кьиле фена.
Ана Агълаб, Хазар, Лукlар, Нуьгди, Белиж хуьрерин, Белиж поселокдин хкягъай командайри иштиракна. Турнирдин судьявилин везифаяр Идрисов Закира тамамарна.
Мярекатда Белиж поселокдин кьил Рамиз Гьабибулаева, поселокдин депутатрин собранидин председатель А.Сефербегова, райондин ва поселокдин собранийрин депутатри, школайрин директорри, общественный тешкилатрин векилри, Ю. Азизован багърийри ва масабуру иштиракна.
Анал рахай Р. Гьабибулаева, А.Сефербегова, рагьметлудан дустари — Эседуллагь Саидова, 3-нумрадин СОШ-дин директор М. Магьмудова, спортшколадин директордин заместитель Н. Ахундова ва масабуру Ю.Азизован уьмуьрдинни кlвалахдин рекьикай, инсанвилин къилихрикай лагьана ва ам эбеди яз поселокдин агьалийрин рикlера амукьдайди къейдна.
Къизгъин ва итижлу къугъунрин нетижада Белиж поселокдин командади — 1, Хазар хуьруьн — 2, Белиж хуьруьн командадини 3-чкаяр кьуна.
Юсуф Азизован багърийрин, посёлокдин администрациядин ва “ОТЕГ” фирмадин патай турнирда иштиракай командайрин вири иштиракчийриз къиметлу пишкешар гана.
КIвенкIвечи чкаяр кьур командайриз медалар, грамотаяр ва къиметлу пишкешар гана.
Поселокдин администрацияди Белижда кьиле тухузвай кlвалахрик къуьн кутунай ва культурадинни спортдин мярекатра активвилелди иштирак авунай командайрин тренеррин зегьмет гьуьрметдин грамотаяр ва къиметлу пишкешар гуналди къейдна.
Рагьметлудан багърийри турнир тешкилайбуруз ва иштиракчийриз сагърай лагьана.
Къагьриман Ибрагьимов
