Ризаев Ислеман Мевлидинович 1962-йисан 9-майдиз Салянрин хуьре дидедиз хьана. Залзала хьайидалай гуьгъуьниз (1969-йис) Испикрин хуьруьз куьч хьана. 5-классдилай кьулухъ кIелунар ЦIийи Испика давамарна. Школа акьалтIарайла, армиядиз фена, Самаркандда авай частуна кьве вацра жегьил аскердин курсара чирвилер къачуна. Отделенидин командир яз Афгъанистандиз рекье туна. Ина ада интернациональный буржи намуслувилелди кьилиз акъудна.
Хайи ватандиз хтай Ислеман Мевлидиновича “Агасиевский” совхозда диспетчервиле кIвалахна, гьа са вахтунда Махачкъалада Дагъустандин культурадин просветительный училищедани кIелна. 1986-йисалай культурадин хиле кIвалахзава, 1989-1995-йисара сифте инструктор-массовик, гуьгъуьнлай райондин культурадин кIвале художественный руководитель яз. Алай вахтунда Испикрин культурадин кIвалин методист я.
1994-йисуз Сулейман-Стальский районда “Афгъанистандин дяведа иштиракайбурун союз” жемиятдин тешкилат арадал гъана. Адан председателвиле И.Ризаев хкяна. И везифаяр ада къени гьакъисагъвилелди, районда авай “афгъанвийриз” вичивай жедай куьмекар гуз, кьилиз акъудзава. Райондин общественный крара активвилелди иштиракзавай касдиз автомашинни пишкешна. Ада республикада тешкилзавай “афгъанвийрин” мярекатра иштиракзава. И.Ризаев Махачкъалада кьиле фейи Дагъустандин халкьарин III съезддин делегат тир.
Умрият Рагьимова,
ДГУ-дин студентка
