Гьар са касдал вичин уьмуьрда гзаф кьадар инсанар дуьшуьш жеда. Адет яз, садбур абурун рикIелай фад алатда, муькуьбуру инсандин уьмуьрда, зигьинда кьетIен гел тада. Зи къилихриз, уьмуьрдиз пис патахъай таъсир авурбурун кьадарни тIимил туш. Амма заз писни хъсан, гьахъни батIул чара ийиз чирайбур зи гьуьрметлу муаллимар я. Зун гьамишалугъ абуруз буржлу тирди за жуваз уьмуьрдин тежриба гзаф жердавай гьиссзава. Ихьтинбурукай сад тир заз дидед чIаланни литературадин тарсар гайи муаллим Исаева Тамара Играмудиновнадин алакьунри, лайихлувилери зун къелем гъиле кьуниз мажбурна. Ада вичин дурумлу ва гьакъисагъ зегьметдалди къазанмишнавай агалкьунар анжах тариф авуниз лайихлу я.
Т.И.Исаева 1968-йисуз Кьурагьа дидедиз хьана. Хуьре школа, 1991-йисуз ДГПУ агалкьунралди акьалтIарна, ада зегьметдин рехъ Кьурагьрин 1-нумрадин юкьван школада дидед чIалан муаллимвилелай башламишна. Тамара муаллимди сифте йикъалай вичин алакьунралди, жавабдарвал гьисс авуналди, пешедив рикI гваз эгечIуналди, аялрин ва диде-бубайрин арада хуш рафтарвилин алакъаяр хуьналди гьуьрмет къазанмишна. Ам вичи тарс гузвай аялриз чирвилер гуз, абурун зигьин ачухариз, фикир хайи чIалал, Ватандал желб ийиз алахъзава.
2018-йисуз Тамара Играмудиновна РФ-дин образованидин лайихлу работник, лагьай тIварцIин, райондин образованидин отделдин гьуьрметдин грамотайрин сагьиб хьана. Идалайни гъейри ада “Йисан муаллим — 2008”,2009-йисуз Махачкъалада кьиле фейи “Дидед чIалан хъсан муаллим”, “Йисан муаллим — 2015”, гьа и йисуз “Хайи чIалан виридалайни хъсан муаллим» лишандик кваз тухвай райондин конкурсрани гъалибвал къазанмишна.
Гьамиша са жуьреда, са къайдада тухузвай тарсарин кесерлувал зайифди жеда. ИкI тахьун патал Тамара муаллимди са шумуд къайдани амал ишлемишзава — гьар са тарс адетдин кIалубдинди тушир жуьреда тухузва: тарс-лекция, тарс-къугъун, тарс-сиягьат, тарс-сегьне ва мсб.
Ада тарсар вичи туькIуьрнавай кабинетда кьиле тухузва. Гьар са классдиз талукь тир ктабри, методикадин пособийри, аялри теснифнавай ва кIватIнавай материалри кабинетдин метлеблувал ва аялрин чирвилер мадни артухарзава. Ана вечерар, кружокар, конкурсар, викторинаяр ва маса мярекатарни тухузва.
Тамара муаллимдин гъилик чирвилер, тербия къачузвай аялри республикадин, райондин олимпиадайра гьамиша пишкешдин чкаяр кьазва. Аялрин чирвилер деринарун, зигьин ачухарун, дидед чIал кIанарун патал ада гьар жуьре темайрай тарсар тухузва, интерактивный доска ишлемишзава.
— За Тамара Играмудиновнадихъ галаз фадлай кIвалахзава. Ам акьалтIай хъсан инсан, вичин предметдал, аялрал ашукь, дерин чирвилер, тербия гуз алакьдай муаллим я. Адахъ аялрин гьевес хкаждай, вичин предмет кIанардай бажарагъ ава, — лугьузва школадин директор Гьамид Мисриева.
— Тамара Играмудиновна къастунал кIеви муаллим, тербиячи хьиз, школадин уьмуьрда кьиле физвай вири мярекатрин иштиракчини я, — къейдзава кIвалахдин юлдаш Марият Рагьимхановади.
Аялриз дерин чирвилер, хъсан тербия гузвай адахъ гьуьрметлу хизанни ава, ам пуд аялдин диде я.
Къуй квехъ чандин мягькем сагъламвал, уьмуьрда хушбахтвал, дережаяр мадни виниз хкаждай къуватар хьурай, гьуьрметлу Тамара Играмудиновна!
Маида Агьмедова
