Гьуьрметлу редакция! Хайиди тир газетдин 3-нумрадиз акъат­навай зи тебрикдин цIарар теснифдайла, вилерин ишигъдикай магьрумвал себеб яз, са бязи ксарин тIварар фикирдай акъат­на. Гьелбетда, санлай 60 тIвар рикIел хкунин ва абуруз талукь цIарар теснифунин карда зи къаршидиз хайи веледар атана. ЯтIани зи фикирдай Абдулбари Магьмудован, Нариман Къа­рибован, Сейфудин Муталибован тIва­рар акъатна. Хайи газет ­акъудуник абурун лайих­лу пайни хьуниз килигна, за умудза­ва хьи, газетдин чинал агъа­дихъ галай цIарарни алава хъийида.

Гьуьрметдивди, Казим Казимов

Кьурагь дагълар адан ери-бине тир,

Абдулбари чаз виридаз  чешне тир.

Икьван ислягь кас уьмуьрда акур туш,

Гьам илгьамдар, инсанперес рикIиз хуш.

 

Хци къелем —  гъиле, бажарагъни­ кьилева,

Къени ният, экуь мурад рикIева.

Хайи халкьдин руьгьдин аскер Нариман,

Теснифчийрин яшлу регьбер Нариман!

 

Сейфудинни ам физавай рекьева,

Куьтягьзавай макъалани гъиле­ва­.­

Журналиствал вири уьмуьр кар хьана,

Кхьинрални гьамиша нур, зар хьана!