Махачкъаладин 11-нумрадин гимназияда “Мне ль тебе, Дагестан мой былинный, не молиться, тебя ль не любить…” лишандик кваз кьиле фейи шегьердин конкурсда республикадин меркезда яшамиш жезвай, ина кIелзавай лезги балайрини иштиракна. Конкурсдин сад лагьай чка лагьайтIа, шегьердин 8-нумрадин школада кIел­за­вай аялрикай ибарат дестеди кьуна.

Милли чIаларал хсуси ва классикрин эсерар кIелунай тафаватлу хьайи командадик лезги чIалан ва эдебиятдин муаллим  Наиля  Урдуханова  ва ада тарс гузвай 5-классда кIел­завай ученик Зилдан Аслановни квай. Гъалибчийриз чпин агалкьун Махачкъала шегьердин образованидин управлениди, 8-лицейдин директор, чи ватанэгьли Земфира Алиевадини мубаракна. Конкурсдин ишти­ракчийрин эсерар Махачкъаладин 160 йисан юбилейдиз талукь “Гьуьлуьн патав гвай зи шегьер” литературадинни музыкадин композициядин сергьятра аваз туькIуьр­на­вайбур тир.

Наиля муаллимди къейдзавайвал, 8-нумрадин лицейда кIелзавайбурун арада яратмишунрал машгъул бажарагълу лезги балаярни ава. Муаллимди яратмишунрай тафаватлу са шумуд ученикдин тIварарни кьуна: Марьям Муртазалиева (4-кл.), Саида Къурбанова (4-кл.), Сулейман Абдул-Рзаев (4-кл.) ва масабур.

Наиля Алимегьамедовна Ахцегьа дидедиз хьана. Школадилай кьулухъ пе­дагогвилин образование къачур же­гьил­ пешекарди сифте Калукрин, гуь­гъуьнлай Къутунхъарин школайра кIва­лахна. Хсуси хизан кутур Наиля уьмуьрди уьлкведин кеферпатаз акъудна. Сибирда яшамиш хьайи йисара ада са общежитидин заведующийвал авуна. 2001-йисалай ада Махачкъала шегьердин 8-нумрадин школада кIвалахзава.

Агъадихъ чна аялрин са бязи яратмишунар гузва.

Зилдан Асланов,

5-класс

Махачкъала

Каспий гьуьлуьн къерехдал

Хкаж хьанва чи шегьер.

Гъил-гъилеваз, лап шаддиз

Санал ала чи эллер.

Са пад — дагълар, са пад — гьуьл,

Шад ийизва чи гуьгьуьл.

Хъсан чка жеч валай,

Зи хайи Махачкъала!

Сулейман Абдул-Рзаев,

4-класс

Ватан

Чан зи диде — Ватан,

Вун я зи чандин дарман.

Авач заз валай масан,

Зи хайи чил — Дагъустан!

Хуш я заз ви кьакьан дагълар,

Берекатлу къацу багълар.

Виридалай гуьрчег рушар

Ава зи Ватанда — Дагъустанда!

Марьям  Гьажибалаева,

4-класс

Ахвар

Акуна заз ахварай дагълар,

ЧIагурнавай цуькверивди багълар.

Физ кIан хьанай заз гьаниз,

ахъайна гуьрцел…

Аватна зун ахварай, гьайиф,

йиф алай къецел.

Марьям  муртазалиева,

4-класс

Мах

— Зун къуьр я. Зи тIвар Зая я. Заз ди­де-буба ава, амма дуст авач. Дуст авачиз пис я. Ша чун дустар жен. Ви тIвар гьикI я?

— Кьуьгъуьр.

— Лап хъсан, вун заз хуш хьанва. Ви далудал алай затIар вучар я?

— Ичер, чуьхверар…

— Заз келемар, газарар кIанда.

Гьа икI къуьрни кьуьгъуьр дустар хьана.

Лейла   исмаилова,

3-класс

Хаз

Хьана кьван, хьанач кьван са хаз. ХъуьтIуьн вах тир. Тама недай затI-матI амачир.  Гишин  хьанвай  хазра  ажузвал авунач, ам викIегьдиз, недай за­тIа­рихъ къекъвез фена. Са хуьруьз атана, кIва­лин рак гатана, недай затI це ла­гьана. Иесиди адаз тIуьн гана. Ахпа ­хазраз кьуьд амай кьван вичихъ галаз яшамиш хьухь лагьана. Хаз рази хьана. Гатфар алукьна, хаз тамуз хъфена.

 Гьазурайди — Дагъви Шериф